Vjedhje në Viva Fresh në Fushë Kosovë, mërgimtari nga Amerika kapet në flagrancë duke vjedhur gjësende

Rastet e vjedhjeve nëpër markete të ndryshme në Kosovë nuk janë të rralla. Një rast i tillë ka ndodhur në rrugën “Dardania” në Fushë Kosovë, në Viva Fresh, ku një shtetas amerikan u kap në flagrancë pasi dyshohet se vodhi mall dhe tentoi të ikë.

Sinjali mëson se bëhet fjalë për një 50-vjeçar me inicialet A.M., mërgimtar nga Amerika, i cili dyshohet se kishte vjedhur disa produkte në një vlerë të caktuar dhe derisa ka qenë duke dalë nga marketi është kapur nga punëtorët e sigurimit.

Ata e njoftuan menjëherë Policinë, me ç’rast një patrullë doli në vendin e ngjarjes.

I dyshuari është arrestuar në vendin e ngjarjes dhe më pas është shoqëruar në stacion policor, nën dyshimet për veprën penale “vjedhje”. Pa dhënies së deklaratës, Prokurori i Shtetit ka nxjerrë aktvendim për ndalim prej 48 orësh.