Shqetësuese: Dhuna në familje në rritje, shumë raste në dy ditët e fundit

Mungesa e hetimeve që çojnë në zgjidhjen e rasteve të dhunës, dënimet e ulëta nga Gjykatat, si dhe mosreagimi i duhur nga ana e Policisë, shpesh janë vlerësuar si disa nga faktorët që po ndikojnë në rritjen e numrit të rasteve të dhunës në familje. Gratë, si viktimat më të shpeshta frikësohen t’i denoncojnë bashkëshortët, çka i shtynë ata që ta përsërisin veprën e njëjtë. Në dy ditët e fundit kanë ndodhur disa raste të tilla, në disa qytete, raporton Gazeta Sinjali.

Sinjali mëson se njëri nga rastet ka ndodhur në fshatin Korroticë e Ulët e Drenasit, ku një burrë dyshohet se ka ushtruar dhunë fizike ndaj bashkëshortes së tij. Pas një konflikti verbal, 54-vjeçari ka eskaluar në dhunë, ku dyshohet se e ka kapur viktimën për fyti. Ai është arrestuar dhe është dërguar në mbajtje.

Probleme në lidhjen e tyre patën edhe një çift në Fushë Kosovë. 29-vjeçarja ka denoncuar në Polici personin me të cilin bashkëjeton, pasi që sipas saj janë fjalosur në një parking në rrugën ‘Dardania’. Pas intervenimit të Policisë, i dyshuari është intervistuar dhe do të hetohet në liri, ndërsa viktima ka shkuar te familja e saj.

Viktimë e dhunës në familje ishte muaj më parë edhe një burrë në fshatin Krushë e Vogël në Prizren. I biri dyshohet se me anë të goditjeve i kishte shkaktuar atij lëndime të rënda trupore, por që më pas ishte arratisur dhe i njëjti ishte në kërkim policor. 22-vjeçari është arritur që të arrestohet të shtunën në Aeroportin Ndërkombëtar të Prishtinës dhe më pas është shoqëruar në stacion policor për intervistim. Me vendim të prokurorit, i riu është dërguar në mbajtje.

Në Polici kanë përfunduar edhe një çift nga Mitrovica, pasi burri dyshohet se ka mbajtur të ngujuar bashkëshorten e tij. Viktima e cila është shtetase e Shqipërisë, ka deklaruar në Polici se i dyshuari ushtronte dhunë psikike e fizike ndaj saj. I dyshuari është arrestuar dhe është ndaluar për 48 orë.

E një pushim për fundjavë në Shqipëri, u kthye në makth për 34-vjeçaren në Fushë Kosovë. Kjo për shkak se bashkëshorti i saj derisa ishin atje, dyshohet se ka fyer me fjalë të rëndë dhe pasi janë kthyer në Fushë Kosovë, nuk e ka lënë të hyjë në banesë. Viktima ka kërkuar ndihmën e Policisë dhe i dyshuari është shoqëruar në stacion policor. Me vendim të prokurorit ai do të hetohet në liri, ndërsa viktima ka shkuar te familjarët e saj.

E dhunë fizike nga bashkëshorti i saj përjetoi edhe një grua dje në Kaçanik. Si pasojë e kësaj ajo ka pësuar lëndime trupore dhe ka kërkuar ndihmën e mjekëve në spital. Ndërkohë rastin e ka denoncuar edhe në Polici dhe si rrjedhojë 33-vjeçari është arrestuar. Me urdhër të prokurorit ai është dërguar në mbajtje.