Dy persona arrestohen për organizim të skemave piramidale në Gjilan

Policia e Kosovës ka arrestuar dy persona në fshatin Cërnicë të Gjilanit, për organizim të skemave piramidale dhe bixhoz të kundërligjshëm.

Pas marrjes së informacionit, forcat e rendit kanë kryer një kontroll në një lokal, ku janë gjetur dhe konfiskuar prova të rëndësishme.

Sipas raportit të Policisë, gjatë kontrollit më 24 janar 2025, janë sekuestruar një telefon mobil, një laptop, disa tiketa të lojës KENO dhe fletore me shënime të ndryshme. Dy të dyshuarit janë intervistuar dhe më pas janë dërguar në mbajtje për hetime të mëtejshme.

“Pas një informate të pranuar se në një lokal ushtrohet veprimtari ilegale ‘Organizimi i skemave piramidale dhe bixhozit të kundërligjshëm’, pas hetimeve të zhvilluara, më 24.01.2025, është kryer kontrolli i lokalit dhe në të njëjtin janë gjetur dhe konfiskuar; një telefon mobil, një llap top, disa tiketa të lojës KENO dhe disa fletore me shënime të ndryshme”, thuhet në raportin e PK-së.