Dyshimet për marrje ryshfeti, Gjykata merr vendimin ndaj zyrtarit të komunës së Gjakovës

Policia e Kosovës, Njësia për Hetimin e Krimeve Ekonomike dhe Korrupsionit në Gjakovë, ka zhvilluar të mërkurën një aksion, që rezultoi me arrestimin e një zyrtari i cili dyshohet se është përfshirë në veprimtari të kundërligjshme. Personi që ra në prangat e Policisë është zyrtar i Komunës së Gjakovës, i dyshuar për korrupsion, raporton Gazeta Sinjali.

Sinjali mësoi ekskluzivisht se zyrtari i gjendjes civile që dyshohet se ka kryer veprën penale “Marrje ryshfeti” është Qazim Ibrahimi.

Ndaj tij, Sinjali mëson se Gjykata tashmë ia ka caktuar masën e paraburgimit të dyshuarit, në kohëzgjatjen e 30 ditëve.

Bazuar në informacionet e para, një qytetar ka denoncuar në Polici se zyrtari Ibrahimi ia ka marrë rreth 200 euro, për t’ia rregulluar disa dokumente.

Me urdhër të Prokurorit të Shtetit, i dyshuari ishte dërguar në mbajtje për 48 orë.

Lajmin për Sinjalin e kishte konfirmuar edhe Policia e Kosovës.

“Sot, 21.08.2024, hetuesit policorë nga Njësia për Hetimin e Krimeve Ekonomike në Gjakovë, është arrestuar një i dyshuar për përfshirje në veprën penale ‘Marrje ryshfeti’. Rasti është trajtuar në koordinim me organet e drejtësisë, me aktvendim të prokurorit i dyshuari është dërguar në mbajtje.”