44 vjeçari kosovar e rrah policin, e bën për spital

Zyrtarët policorë si gjatë kohës kur janë në kryerje të detyrës e edhe atëherë kur janë me rroba civile, ndodh t’i zë sherri me qytetarë, të cilët në shumë raste i ofendojnë, kërcënojnë  e sulmojnë ata.

Një rast i tillë ka ndodhur mbrëmë në një restorant në Rahovec, ku një person dyshohet se ka sulmuar fizikisht një zyrtar policor, i cili ishte jashtë detyrës zyrtare.

Burimet e Gazetës Sinjali brenda Prokurorisë kanë bërë me dije se pas një konflikti verbal, 44-vjeçari dyshohet se ka eskaluar në dhunë fizike, duke goditur me shishe qelqi policin.

Si pasojë e kësaj, viktima ka marrë lëndime trupore dhe ka kërkuar ndihmë mjekësore, ndërkohë që njësitë policore kanë arritur që ta arrestojnë të dyshuarin.

I dyshuari është shoqëruar në stacion policor dhe i është nënshtruar testit të alkoolit, ku ka rezultuar në gjendje të dehur.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor nën dyshimet për kryerjen e veprës penale ‘Lëndim i lehtë trupor’.