Rekomandohet suspendimi i tre policëve që festuan me njeriun e Enver Sekiraqës
Është rekomanduar suspendimi i tre pjesëtarëve të Policisë së Kosovës, të cilët festuan me njeriun e afërt të Enver Sekiraqës, rast për të cilin raportoi Paparaci pasditen e së hënës.
Kështu kanë konfirmuar për Paparacin nga Inspektorati Policor i Kosovës.
“Inspektorati Policor i Kosovës respektivisht Departamenti i Hetimeve sipas detyrës zyrtare ka filluar hetimet ndaj tre zyrtarëve policorë të cilët sipas publikimit të një video në media ku bazuar në këtë video dyshohet janë në shoqërim të personave me të kaluar kriminale (shoqërim me personin e dyshuar për nxitje të vrasjes së ish-pjesëtarit të Policisë së Kosovës Triumf Riza).
Lidhur me rastin është informuar Prokuroria e Shtetit, ndërkaq në interes të zhvillimit të hetimit IPK ka rekomanduar suspendimin e tre zyrtarëve policorë. Veprimet e tjera hetimore do të ndërmerren sipas autorizimeve ligjore të IPK-së”, thuhet në përgjigjen zyrtare të IPK-së.
