Pas goditjes së tretë ra përtokë dhe filloi të dridhej, ky është 41-vjeçari shqiptar që humbi jetën në Itali

Elton Bani është 41-vjeçari që vdiq të dielën pasdite në Itali, pasi u qëllua me elektroshok gjatë një operacioni të karabinierëve.

Me origjinë nga Shqipëria, Bani kishte jetuar prej kohësh në Liguria, duke punuar si murator së bashku me vëllain e tij.

Ai nuk ishte i panjohur me forcat e rendit, më parë kishte vuajtur një dënim njëmujor për falsifikim.

Ngjarja e rëndë ndodhi më 17 gusht.

Sipas mediave italiane, Bani filloi të hidhte objekte dhe karrige në oborrin e shtëpisë së tij.

Kur mbërritën karabinierët u përpoqën ta qetësonin dhe ta bindnin të kthehej brenda për të marrë dokumentet.

Por në shkallë, 41-vjeçari u kundërpërgjigj me shqelma dhe grushte. Edhe pasi e prangosën, ai vazhdoi të godiste me shqelma dhe të luftonte.

Në atë moment, njëri nga oficerët nxori armën me elektroshok. Goditja e parë vetëm sa e preku, e dyta nuk e ndaloi. Një goditje e tretë bëri që ai të binte në tokë, duke u dridhur dhe duke humbur ndjenjat.

Personeli i urgjencës mjekësore u përpoq ta ringjallte për një kohë të gjatë, por pa sukses. Shkaku i saktë i vdekjes do të sqarohet vetëm nga autopsia.