Një i vdekur nga vetaksidenti i rëndë në autostradën “Ibrahim Rugova”
Një person ka vdekur pas plagëve të marra në vetaksidentin e rëndë që ngjau në orët e para të ditës së shtunë në autostradën “Ibrahim Rugova” e për të cilin raportoi edhe lajmi.net.
Zëdhënësi i Policisë së Kosovës, Baki Kelani për lajmi.net konfirmoi vdekjen e njërit prej personave që ishin brenda veturës të tipit Suzuki, me targa lokale.
“Me datën 02.09.2023 rreth orës 06:10, në autostradën Ibrahim Rugova në km 24 drejtimi i Vërmicës, ka ndodhur një vet aksident me lëndime trupore, ku një automjet Suzuki me targa lokale me vozitës mashkull kosovar, dyshohet se ka humb drejtimin dhe është rrokullisur në rrugë, me ç ‘rast lëndime trupore kane pësuar dy persona, njeri prej të cilëve më vonë ka ndërruar jetë. Në vendin e ngjarjes kanë dalë patrulla policore, njësia e hetimeve, kompania për mirëmbajtjen e rrugës. Në lidhje me rastin është njoftuar prokurori kujdestar, përderisa janë marrë të gjitha veprimet e nevojshme policore”.
Gjithashtu, Policia e Kosovës ripërsëriti thirrjen për kujdes të shtuar në trafik.
“Policia e Kosovës, vazhdon të apeloj te të gjithë pjesëmarrësit në trafik, që të kenë kujdes më të shtuar, të respektojnë rregullat e trafikut dhe të ju përmbahen kushteve të rrugës, në mënyrë që të gjithë së bashku të kontribuojmë për një siguri më të madhe në trafik dhe në parandalim të aksidenteve”.
