Kur mund të lëvizim pa viza në BE nëse vendimi merret këtë vit?
Shefja e Grupit Parlamentar të LVV-së, Mimoza Kusari-Lila, ka folur rreth liberalizimit të vizave.
Ndonëse thotë se gjasat janë reale që Kosova ta marrë vendimin pozitiv këtë vit, ajo sqaron se tek vitin tjetër kosovarët mund të lëvizin të lirë.
Zgjatja e këtij procesi, sipas Kusari-Lilës, mund të ndodhë për shkak se së pari merret vendimi e pastaj fillon zbatimi i tij dhe se duhet që të përfundojnë shumë çështje teknike e të njoftohen shtetet anëtare.
“Gjasat janë reale megjithatë janë gjasa të cilat nga ana jonë janë vlerësuar edhe më herët që janë plotësuar të gjitha kushtet ndërsa varet nga një mekanizëm tjetër jashtë nesh për të përcaktuar procesin final të liberalizimit të vizave”.
“Duhet të kemi parasysh që edhe nëse ka një vendim deri në fund të vitit liberalizimi ndodh tek vitin tjetër sepse është një procedurë kohore drejt shpërndarjes së materialeve natyrisht edhe çështjeve teknike që lidhen me sistemet kufitare e të gjitha vendeve që janë pjesë e sistemit, prandaj që të mos kemi ngritje të shpresave që në fund vit mund të udhëtohet pa viza kjo është një proces që së pari merret vendimi e pastaj fillon zbatimi i tij që merr edhe disa muaj kohë”, tha Kusari-Lila, raporton EO-ja.
