Kosova po zbrazet për faj të Kurtit, shqetësuese do të jetë situata pas 1 janarit

Parlamenti Evropian më 18 prill miratoi vendimin për liberalizimin e vizave për qytetarët e Kosovës.

Zyrtarisht heqja e vizave për kosovarët pritët të bëhet me 1 janar të vitit të ardhshëm.

Qytetarët të cilët posedojnë pasaporta biometrike të lëshuara nga shteti i Kosovës, do të mund të udhëtojnë pa viza në zonën Schengen.

Por, së fundmi Kosova është goditur me disa sanksione për mos shtensionimin e situatës në veri nga Bashkimi Evropian.

A do të ndikojnë këto ndëshkime në shtyrje apo pengesë në liberalizimin e vizave?

Për këtë çështje ka folur për Front Online kryetarja e Komisionit për Integrime Evropiane, Rrezarta Krasniqi.

Krasniqi tha se ende nuk është marr ndonjë vendim karshi kësaj situate.

Sipas saj, shkaktari kryesor i zgjatjes së këtij procesi është Qeveria Kurti.

“Ne para disa ditëve kemi pasur në raportim ambasadorin e BE-së, ku kemi bërë pyetje për liberalizimin e vizave, është thënë që po shikohet se çfarë po ndodh me takimet e fundit që i kanë. Po presim pas deeskalimit se çfarë po ndodhë dhe shpresojmë që mos të ketë diçka për procesin e vizave se ky proces ka qenë i tej-zgjatur shkak edhe i kësaj Qeverie”, thotë deputetja e LDK-së.

Fajin për ikjen e të rinjve nga vendi, deputetja Krasniqi, e ka hedhur tek qeverisja aktuale.

Ajo thotë se mbas 1 janarit pritët të ketë largim të kosovarëve nga vendi.

“Gjatë kësaj qeverisje kanë ikur më shumë se 100 mijë qytetarë, rinia po ikë dhe kjo është shqetësuese, por shqetësuese do të jetë edhe mbas 1 janarit, por është mirë me dalë edhe me parë qytetarët se qysh janë vendet evropiane dhe me parë që më mirë se vendi ynë nuk ka”, tha Krasniqi.

Deputetja e LDK-së, Rrezarta Krasniqi ka folur për Front Online lidhur me veprimet e kryeministri Albin Kurti karshi situatës në veri.

Ajo tha se pasi u godit Kosova me sanksione nga BE-ja, Kurti e pranoj fajin e vet.

“Çfarë ka ndodh në pjesën veriore ka qenë pa koordinimin e BE-së, ka qenë shumë shqetësuese për qytetarët se pjesa e veriut ka qenë si mbas lufte. Kurti e pranoj fajin që ka bërë por me vonës, pasi që kemi pas sanksione nga BE-ja”, theksoi ajo.

Deputetja Krasniqi thotë se zgjedhjet në veri i përkasin kryeministrit pasi qytetarët e kanë zgjedhur.

“Në vend se të ulemi të diskutojmë për njohje të reja, aplikim në organizata ndërkombëtare ne vetëm po sanksionohemi. Ne e kemi parë Kurtin që është pajtuar për deeskalimin e situatës tash edhe do të organizohen zgjedhjet e reja atje, ne po humbmi kohë dhe financa por kjo i mbetet Kurtit se qytetarët i kanë besuar, presim që kur ka zgjedhje të ndëshkohet pasi të gjitha parimet i ka shkelur”, u shpreh deputetja.