Konflikti me NATO-n: Zyrtari i partisë së Vuçiqit akuzon ambasadorin rus
Ish-deputeti serb Dragan Shormaz ka reaguar lidhur me deklarimet e ambasadorit rus në Beograd, Aleksandar Bocan-Harchenko, për një konflikt të mundshëm të Serbisë me NATO-n.
Zyrtari i partisë së Aleksandar Vuçiqit e ka akuzuar ambasadorin rus për ndërhyrjet e këtij të fundit në çështjen e Serbisë.
“Derisa ushtarët rusë shtrihen si minjtë në baltën e Ukrainës dhe qindra prej tyre vdesin çdo ditë, ky zyrtar [ambasadori rus] i regjimit kriminal vazhdon paturpësisht të ndërhyjë në punët e brendshme të Serbisë dhe të uron konfliktin tonë me NATO-n! Kjo nuk do të ndodhë. Vetëm një budalla shkel dy herë në të njëjtin gur”, citon Shormaz në Twitter, shkruan The Geopost.
Indiferent ndaj kësaj nuk ka qëndruar eksperti i sigurisë, Agim Musliu, i cili ka thënë se paraqitja e ambasadorit rus, pas shfaqjes së grupeve kriminale në barrikada, e plotëson mozaikun e ndërhyrjes ruse në Kosovë përmes Serbisë.
“Pas paraqitjes së Wagnerit, Qendrës së Spiunazhit në Nish dhe grupeve të tjera në barrikadat në veri të Kosovës, tani u shfaq edhe ambasadori rus në Beograd. Kjo plotëson mozaikun e përfshirjes ruse në Kosovë përmes Serbisë”, ka shkruar ai.
