Ish-ministri i Shëndetësisë, Numan Baliq ia mbath nga Kosova, i ikë vuajtjes së dënimit për sulm seksual

Ish-ministri i Shëndetësisë, Numan Baliq, i dënuar me burgim për veprën penale të sulmit seksual nuk po e vuan dënimin. Baliq ia ka mbathur nga Kosova për të evituar dënimin që Gjykata e Apelit ia uli nga dy vite burgim në një vit burgim, në nëntor të vitit të kaluar.

Ky ish-profesionist shëndetësor, i cili jo vetëm që ka kryer veprën penale të sulmit seksual, po arrin të ikë nga vuajtja e dënimit. Burimet e Gazetës Sinjali kanë bërë me dije se Baliq dyshohet se tashmë është vendosur në shtetin e Bosnjë Hercegovinës, ku pritet të ushtrojë profesionin e mjekut.

Baliq është dënuar nën akuzat se më 12 gusht 2020, në Spitalin e Përgjithshëm në Pejë, në zyrën e tij, me dashje e në cilësi të profesionistit shëndetësor duke keqpërdor gjendjen shëndetësore të viktimës A.I, e nxit të njëjtën që ta prek me qëllim seksual pa pëlqimin e saj.

Pas arrestimit, ai ka qëndruar në paraburgim, periudhë kjo e vetme që ai kaloi si i paraburgosur. Kjo është konfirmuar edhe nga Shërbimi Korrektues i Kosovës.

Zëdhënësi i SHKK-së, Florent Gashi, tha për Sinjalin se në bazë të të dhënave të ShKK-së evidentohet se Baliq ka qenë i paraburgosur në Qendrën e Paraburgimit në Pejë, ku i njëjti është pranuar me datën 13.08.2020, ndërsa i është ndërprerë paraburgimi dhe është liruar me datën 06.10.2020.

Në anën tjetër, Sinjali ende s’ka pranuar përgjigje nga Gjykata Themelore e Pejës përkundër insistimit për të marrë informacione lidhur me mos ekzekutimin e vendimit apo urdhëresës për paraqitje në vuajtje të dënimit.

Kujtojmë se Numan Baliq ishte arrestuar nga Policia e Kosovës më 13 gusht të vitit 2020.

Lexo edhe:  “S’e dini me kon keni punë, shkoni azil se s’kom me iu lanë vend kun”/ Pejani kërcënon policët që shkuan të intervenojnë në një aksident