E turpshme: 45-vjeçari e ngacmon seksualisht një vajzë 14-vjeçare në liftin e banesës

Vajzat dhe gratë po vazhdojnë të jenë viktimat më të shpeshta të dhunës në familje, ngacmimeve e sulmeve seksuale.

Siguria e vajzave po cenohet edhe në hapësira publike, shkolla, mjete të transportit e në rrugë. Viktima të këtyre rasteve shumë shpesh janë edhe të miturat.

Një rast i tillë ka ndodhur së fundi në ashensorin e një banese në rrugën “Beteja e Loxhës”, në Pejë, ku një person dyshohet se e ka ngacmuar seksualisht një vajzë 14-vjeçare.

Burimet e sinjalit brenda Prokurorisë kanë bërë me dije se bëhet fjalë për një 45-vjeçar, i cili po dyshohet se derisa ndodhej në lift bashkë me të miturën, ka nisur ta ngacmojë seksualisht, duke i shkaktuar frikë e shqetësim.

Përballë kësaj situate, viktima ka vendosur që ta denoncojë rastin në Polici, ku ka rrëfyer detajet e asaj që ka ndodhur.

Si rezultat i denoncimit, 45-vjeçari i dyshuar është arrestuar dhe është shoqëruar në stacion policor për intervistim.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Ngacmim seksual’.

(foto ilustrim)