Çfarë thonë parashikimet: A do të bie borë në fundjavë?

Reshjet e para të borës në viset e larta malore në Kosovë kanë ndodhur javë e muaj më parë, por në zonat mesatare dhe të ulëta mbidetare ende nuk ka rënë bora e parë.

Nga sot do të ndryshojnë rrymimet ajrore në Kosovë dhe rajon dhe erërat jugore e jugperëndimore do të “zëvendësohen” nga ato veriperëndimore, veriore e verilindore dhe kjo nënkupton ulje e temperaturave për shkak të rrymimeve ajrore më të ftohta nga veriu. Ulja e temperaturave nuk do të jetë shumë e madhe, por mëngjesi i së shtunën pritet të jetë mjaft i ftohtë dhe me acar.

Gjatë së shtunës do të kemi ardhjen e vranësirave të reja nga Mesdheu dhe ajri i ftohtë do të jetë prezent në sipërfaqe dhe për këtë shkak do të fillojnë reshje bore në mbrëmje ose gjatë natës. Nuk priten reshje në tërë territorin e Kosoves, por vetëm vende-vende dhe po ashtu nuk pritet borë në zonat më të ulëta të vendit.

Një valë reshjesh shiu e bore do të vijë të dielën ku priten reshje bore të cilat po ashtu nuk do të jenë prezente në të gjitha ultësirat dhe po ashtu nuk pritet të ketë reshje të mëdha bore, madje as në zonat kodrinore-malore nuk priten reshje shumë të mëdha.

Reshjet do të jenë estetike për shkak se do të jenë reshjet e para sezonale për zonat paksa më të ulëta dhe euforia do të bëjë të veten.

Sidoqoftë, të dielën në shumë pjesë të Kosovë pritet të kemi reshjet e para të borës. Shtresa priten vetëm në zonat kodrinore-malore dhe atë kryesisht shtresa të vogla bore. Nëpër ultësira shtresa krejtësisht simbolike të cilat do të zhduken shumë shpejt, prandaj ti shijojmë sa më shumë fjollat e borës që priten të dielën.

Në afat pak më të gjatë parashikimet janë më së optimistike, ngase një kohë të gjatë kemi një masë të fuqishme ajrore me presion të lartë atmosferik në Skandinavi dhe Rusi dhe kjo është ajo çfarë nevojitet për një dimër premtues në Evropë dhe rajonin tonë , por mbetet të shihet./MeteoBallkan