Brenda pak orëve shkaktohen tri aksidente në trafik në Viti, shtatë të lënduar

Aksidentet në trafik janë një dukuri shqetësuese në vendin tonë, ku për çdo ditë regjistrohen dhjetëra të tilla në të gjitha qytetet e Kosovës. Ato zakonisht ndodhin si pasojë e pakujdesisë së shoferëve gjatë vozitjes, duke rrezikuar kështu jetën e tyre dhe të pjesëmarrësve tjerë në trafik.

Vetëm gjatë ditës së djeshme në komunën e Vitisë janë shënuar tri aksidente në komunikacion, prej ku kanë mbetur të lënduar shtatë persona.

Sinjali mëson se në orën 14:40 një shofere ka shkaktuar vetaksident në rrugën Kllokot – Viti, ku si pasojë e mospërshtatjes së shpejtësisë me kushtet e rrugës. Për shkak të lëndimeve të marra, 28-vjeçarja ka kërkuar ndihmë mjekësore në Qendrën Emergjente në Spitalin rajonal në Gjilan.

E gjysmë orë më vonë në të njëjtën komunë u shkaktua një aksident tjetër me lëndime, ku në rrugën ‘Adem Jashari’, u ndeshën dy vetura prej të cilave mbetën të lënduar pesë persona. Sipas burimeve të Sinjalit, edhe këtu deri te aksidenti ka ardhur për shkak të mospërshtatjes së shpejtësisë me kushtet e rrugës. Të gjithë personat e lënduar janë dërguar në Emergjencën e Gjilanit për tretman mjekësor.

E një aksident tjetër ndodhi pak më vonë në fshatin Binqë, ku u përfshinë një veturë dhe një motoçikletë. Si pasojë e këtij aksidenti është lënduar një person, i cili po ashtu kërkoi ndihmë mjekësore në Spitalin e Gjilanit.

Lexo edhe:  Deri 9 orë pa rrymë - Vendet që do të përballen me ndërprerje sot dhe nesër!