Auditori gjen se Komuna e Shpejtim Bulliqit u dha tenderë milionësh kompanive pa i plotësuar kriteret
Zyra Kombëtare e Auditimit, në raportin e saj vjetor për pasqyrat financiare në Komunën e Podujevës, ka gjetur se në tre tenderë milionësh ishin shpërblyer me kontrata kompani që nuk i plotësonin kriteret e vendosura në dosje nga vetë komuna, e udhëhequr nga Shpejtim Bulliqi, shkruan Reporteri.net.
Një prej këtyre rasteve është tek kontratat për ndërtimin e kanalizimit nga fshati Lluzhan-Lupç, Gërdofc-Lluzhan, Majac-Lupç dhe Sfeqël-Lluga. Ky tender ka qenë i ndarë në tri lote, në vlerë totale 3 milinë e 483 mijë e 343 euro.
“…në njoftimin për kontratë dhe dosjen e tenderit në kërkesën për kapacitetin ekonomik dhe financiar ku përveç tjera kërkohen pasqyrat financiare të audituara ndërsa (OE) në ofertën e tij ka paraqitur raportin e rishikimit të pasqyrave financiare”, theksohet në raport.
Shpërblimi me kontratë i kompanive pa i plotësuar kriteret, është bërë edhe në dy tender tjerë milionësh. Njëri në vlerë 2 milionë e 430 mijë e 303 euro për ndërtimin e Shkollës së Mesme Profesionale në Zonën Industriale, si dhe një tjetër në vlerë 1 milion e 440 mijë e 787 euro për ndërtimin e Tregut të Gjelbër.
“…në njoftimin për kontratë dhe dosjen e tenderit në kërkesën për kapacitetin teknik dhe profesional, kërkohet në aneksin 7 për pajisjet dhe mekanizmin me nr. rendor 1-10 kompresor për thyerjen e betonit që të dëshmohet nga pajiset dhe mekanizmi më librezë të qarkullimit. Në ofertat e dorëzuara në shënimin për lista e makinerisë për kompresor për thyerjen e betonit tek kolona shënimet re kapitulluese për secilën pajisje ka shënuar librezen, për të cilin nuk ishte dokumenti i librezës së qarkullimit”, ka gjetur auditori.
Komuna ka vepruar në të njëjtën formë edhe te kontratat për asfaltimin e rrugëve në qytet, për llotin I dhe llotin II.
Përderisa në dosje ishte kërkuar që kompania të ofronte librezë të qarkullimit për pajisjet dhe mekanizmin e përdorur, në ofertë ka munguar libreza. Pavarësisht kësaj, kompania është shpërblyer me të tri llotet.,
“Në njoftimin për kontratë dhe në dosjen e tenderit është parapara që vetëm në një llot mund të shpërblehet një operator tutje janë kërkuar për kapacitetin teknik dhe profesional pajisjet dhe mekanizmin kërkohet në aneksi 7 më në listën e makinerisë për pikën 12 Cilindër, max 3t dhe pikën 16 kompresor për thyerjen e betonit. Në ofertën e dorëzuar për Cilindër max 3t është referuar dëshmimi më faturë 22/19 e datës 15.04.2019 dhe për kompresorin me librezën e qarkullimit, e që mungojnë në ofertë (fatura dhe libreza e qarkullimit), ndërsa OE ishte kontraktuar për tri llotet në fjalë”, thuhet në raport.
Gjetja tjetër e Auditorit është tek kontratat për rregullimin e hapësirave publike përgjatë lumit Llap në këtë qytet,
Në njoftimin për kontratë dhe dosjen e tenderit në kërkesën për kapacitetin teknik dhe profesional, kërkohen certifikatat ISO dhe menaxherin e projektit- inxhinier i diplomuar ose bachellor ielektros përfshirë kontratën për projektin në fjalë.
“ Për llotin III OE fitues nuk i kishte bashkangjitur në ofertë ISO standardet, ndërsa për llotin IV OE fitues në vendimi i menaxherit të kontratës nuk i ishte referuar kontratës por për projekte të ndryshme elektrike dhe nuk ka prezantuar kontratë për projektin në fjalë”, thekson ZKA.
Sipas Auditorit, në asnjë tenderim Komuna e Podujevës nuk kishte kërkuar sqarim të tenderëve.
“Kjo ka ndodhur si pasojë e mungesë së funksionimit të kontrolleve të brendshme, në fushën e prokurimit”, vazhdon raporti.
Sipas ZKA’së, kontraktimi i kompanive në këtë formë eliminon mundësinë e një procesi të mirëfilltë të prokurimit, i cili mund të përjashtoj nga procesi kompani të përgjegjshëm dhe mund të ndikoj që kontrata të mos realizohet.
“Kryetari duhet të sigurojë forcimin e kontrolleve në fushën e prokurimit, në mënyrë që vlerësimi i ofertave të bëhet në pajtueshmëri të plotë me kërkesat e vendosura në dosjet e tenderit dhe në pajtueshmëri me kërkesat ligjore. Po ashtu, përmes zyrtarëve përgjegjës të sigurojë se anëtarët e komisioneve i kuptojnë detyrat dhe përgjegjësitë e tyre në angazhimet përkatëse, dhe në rast të gabimeve eventuale këto të evidentohen nga zyrtarët e prokurimit para nënshkrimit të raportit të vlerësimit”, thuhet në raport.
