Kompania e pronarit të “Apetit”-it furnizon burgjet e Kosovës me mish

Kompania me emrin “Riki Invest” është kompani me pronar të njëjtë si ajo “Apetit”, e cila nga një storie hulumtuese nga mediat e Shqipërisë u zu duke falsifikuar dokumente dhe ndryshuar origjinën e mishit të Brazilit e duke e shitur për “mish të freskët të Kosovës”, është operatori ekonomik që furnizon burgjet e Kosovës me mish.

Zyrtari i Lartë për Komunikim me Publikun, Florent Gashi, ka treguar për Albanian Post se furnizimi me mish në Shërbimin Korrektues të Kosovës furnizohet me mish nga kompania “Riki”.

“Shërbimi Korrektues i Kosovës është pjesë e kontratës se lidhur nga ana e Agjencionit Qendror të Prokurimit (AQP). Bazuar në këtë kontratë furnizimi bëhet nga Operatori Ekonomik ‘Riki’”, thuhet në përgjigjen e Gashit.

Gjithsesi, ai ka treguar edhe se “SHKK ka edhe thertoren e vet, e cila gjendet në Qendrën Korrektuese të Dubravës, ku theren kafshët e konfiskuara nga Dogana e Kosovës”.

Gashi nuk ka treguar se kur është lidhur kjo kontratë me këtë kompani e as cila është vela e saj.

Se pronari i kompanisë “Riki” është kuptohet nga Agjencia e Regjistrimit të Bizneseve të Kosovës, ku thuhet se Sami Ferizi është drejtor menaxhues dhe pronar i vetëm.

Te dhenat nga ARBK per pronesine e kompanise “Riki”

Po në ARBK, mund të shihet se i njëjti është edhe bashkëpronar te kompania “Apetit”.

Qeveria e Kosovës nuk ka bërë të ditur nëse do ia ndërpres kontratën kësaj kompania, pasi u dokumentua përmes videos se si pronari i kësaj kompania pranon para gazetarit se ai bën falsifikime të dokumenteve dhe e shet mishin e Brazilit, për mish të Kosovës.

Shërbimi Korrektues i Kosovës është institucion brenda Minsitrisë së Drejtësisë.

Për rastin nuk ka reaguar akoma as ministrja e Drejtësisë, Albulena Haxhiu.

Kompania “Riki” dhe kompania “Apetit” me pronarë të njëjtë kanë edhe tenderë të tjerë të fituar nga shteti.