Vajza e Fahri Musliut i reagon Velës: Mënyra juaj e komunikimit është për keqardhje
Valbona Musliu, vajza e gazetarit Fahri Musliu i ka reaguar ashpër Blerim Velës, shefit të stafit të presidentes, Vjosa Osmani, rreth një shkrimi të bërë sot ku me tallje ka kërkuar që Aleksander Vuçiq të bëjë poligrafin dhe analizën e ADN-së bashkë me gazetarin Fahri Musliu.
Musliu tha se vetëm frikacakët, jo profesionistët, injorantët e të përdalët shkruajnë shkrime e më pas i fshijnë.
“Blerim Vela, para se te shkruash apo te komentosh mendo dy here. Ose shkruaj e mos fshi, ose mos shkruaj fare.Vetem frikacaket, jo profesionistet, injorantet e te perdalet shkruajne e me pas fshijne… E te guximshmit, profesionistet, e te moralshmit u qendrojne prapa shkrimeve, fjaleve, statuseve e komenteve”, ka shkruar ajo.
“Blerim Vela sikur te isha afer do te vendosja ne peshore per me e mate peshen tende me karrieren e Fahri Musliut, Po,Po, do i vendosja ne peshore edhe vitet e tua nese jane 50-te, sa ka karriere Fahri Musliu, e besa do e peshoja edhe trurin tend e intelektin. Mire qe nuk jam afer, dhe nuk kam mundesi, sepse do te peshoja edhe me librat e shkruar, analizat, e mos te flas per raportet, intervistat e te tjera pune gazetareske te Fahriut….e mos ta le anash edukaten familjare, dhe sa do kisha dashur qe nje bagazh i tille i nje intelektuali, e mbi te gjitha nje njeriu qe ska lepire ne pjata te huaja e as ne kepucet e huaja, te ishte ne institucionin qe ti edhe perfaqeson sot. Blerim”, shkroi më tutje ajo.
Pas reagimeve të shumta që mori, Vela ka mbyllur llogarinë e tij në X, teksa ka thënë për Expressin se i kërkon falje Musliut dhe publikut kosovar.
Ai është shprehur se s’ka arritur të përçojë mesazhin në mënyrë të qartë, kur ka dashur të theksoj absurditetin e çështjeve që lidhen me Vuçiqin dhe qasjen e presidnetit serb në raport me Musliun dhe Kosovën.
“I kërkoj falje gazetarit Fahri Musliu dhe publikut, që në përpjekjen time për ta theksuar absurditetin e çështjeve në fokus të presidentit të Serbisë dhe qasjen e tij në raport me z. Musliu dhe me ne, nuk kam arritë ta përqojë mesazhin qartë”, ka thënë Vela.
Ai tutje ka thënë se kërkon falje të sinqertë për komentet e tij dhe thotë se s’kanë pasur qëllim ta lëndojnë gazetarin Musliu apo ta lëndojë personalitetin e tij.
“Ju kërkoj ndjesë të sinqertë për komentet e papërshtatshme nga ana ime që gjithsesi nuk e kishin qëllimin ta lëndojnë z.Musliu apo personalitetin e tij. Prandaj i kërkoj falje edhe një herë, sinqerisht!”, ka shtuar ai.
Në fund Vela ka thënë se komenti i tij s’përfaqëson presidencën.
“Shpresoj në mirëkuptimin tuaj dhe ju siguroj që komenti im nuk e përfaqëson Presidencën”, ka përfunduar ai.
Postimi i Velës erdhi pas publikimit të videos, ku Vuçiq kishte dalë bashkë me babain e tij, Angjelko Vuçiq, për të demantuar pretendimet rreth tij dhe Fahri Musliut.
Ndryshe gazetari në pension Fahri Musliu në vazhdimësi ka demantuar pretendimet se “është babai i Aleksander Vuçiqit”, duke sqaruar se me nënën e Vuçiq kanë qenë vetëm kolegë të mirë.
