Dokument: Marrëveshja e mundshme Kosovë – Serbi
Një dokument me tetë pika të Kornizës së Marrëveshjes mes Kosovës dhe Serbisë, është vënë në qarkullim në qarqet politike dhe diplomatike në rajon.
Ky dokument në formën e një “non paper”, i pakonfirmuar ende zyrtarisht, pretendohet se ka qarkulluar së pari në Serbi, raporton Paparaci.
Paparaci, nga burime diplomatike rajonale, ka siguruar pikat e plota të këtij dokumenti.
Sipas konkluzioneve të paraqitura në këtë dokument, Serbia do të njoh targat e automjeteve me mbishkrimin “SER-RKS” dhe do të lejojë përdorimin e leternjoftimëve të Kosovës në territorin e saj.
Një pikë tjetër e këtij “non paperi” thotë se Serbia do të mbështes emërimin e Veton Surroit në pozitën e Sekretarit të Përgjithshëm të Këshillit për Bashkëpunim Rajonal (RCC), ndërkaq Kosova “merr pjesë në takimin e ardhshëm të Open Balkan”.
Po ashtu, dokumenti sugjeron se Serbia do të pajtohet të përdor termin “Kosovë” në komunikim dhe përfaqësim.
Pikat e plota të “non paper”-it:
Procesi i normalizimit Serbi – Kosovë – Korniza rajonale:
– Serbia njeh mbishkrimin “SER – RKS” të targave të automjeteve dhe mbështet vendosjen e tyre në komunitetin serb në Kosovë
– Serbia lejon përdorimin e leternjoftimëve të Kosovës në territorin e saj dhe mbështet lëvizjen pa pagesë me letërnjoftim në WB6 – gjashtë shtetet e Ballkanit Perëndimor (të dakorduar tashmë në kuadër të procesit të Berlinit);
– Serbia pajtohet për përdorimin e termit “Kosovë” në komunikim dhe përfaqësim;
– Serbia mbështet nominimin dhe zgjedhjen e Veton Surroit në pozitën e Sekretarit të Përgjithshëm të Këshillit të Bashkëpunimit Rajonal, i ngarkuar për “përafrim” në Iniciativën e Ballkanit të Hapur dhe Procesin e Berlinit; Kosova mbështet nominimin dhe zgjedhjen e kandidatit serb për Sekretar të Përgjithshëm të CEFTA-s; Sekretari i CEFTA-s caktohet vitin e ardhshëm (qëllimi përfundimtar është të inkorporojë CEFTA-n si pjesë e procesit të Berlinit);
– Kosova është e ftuar dhe merr pjesë në takimin e ardhshëm të Open Balkan ku shpallet marrëveshja për tri pikat e lartpërmendura dhe adresohen çështje të tjera të bashkëpunimit rajonal, gjegjësisht marrëveshja për ushqim dhe energji;
– Kosova dhe Serbia, së bashku me 4 vendet e tjera të Ballkanit Perëndimor përgatisin një iniciativë drejt integrimit në BE për nënshkrimin e një Traktati për anëtarësimin e gjashtë vendeve të Ballkanit Perëndimor në zonën tregtare të Bashkimit Evropian pas plotësimit të standardeve;
– Kosova dhe Serbia së bashku me QUINT-in punojnë në një “paketë sigurie” e cila përfshin përcaktimin e kornizave për shkelje të sigurisë, provokime dhe ndërhyrje nga “aktorët e tretë”, si dhe hapat për t’i zbutur ato;
– Plani gjithëpërfshirës për sigurinë energjetike në rajonin e Ballkanit Perëndimor – harta e tubacioneve të gazit, burimeve të mundshme të gazit, rezervave të qymyrit dhe mundësia e eksploatimit me dëme minimale mjedisore, bërthamore, diellore, etj. (punë e përbashkët e këshillit ndërqeveritar të Ballkanit Perëndimor, Bashkimit Evropian dhe SHBA-së).
