Në kundërshtim të barrikadave në veri të Kosovës, mërgimtari bllokon një pjesë të një rruge në Evropë

Në shenjë proteste me politikën jo konsekuente dhe joparimore të  Evropës, e cila toleron barrikadat e bandave serbo-ruso në veri të Kosovës, mërgimtari Brahim Shabani me fëmijët e tij ka bllokuar një pjesë një rruge në afërsi të urës e cila lidh Francën dhe Gjermaninë.

Nga 10 dhjetori, grupe të serbëve në veri të Kosovës kanë ngritur barrikada në rrugët që çojnë drejt vendkalimeve kufitare me Serbinë, Jarinjë dhe Bërnjak.

Me këtë veprim, ata i janë përgjigjur arrestimit të ish-policit serb, Pantiq, i dyshuar për një sulm kundër zyrtarëve të Komisionit Qendror të Zgjedhjeve në veri.

Autoritetet e Kosovës kanë thënë se kanë kapacitete për heqjen e barrikadave, por se janë duke i dhënë kohë misionit të NATO-s, KFOR, që ta bindë komunitetin lokal që t’i zhbllokojë vetë rrugët.

Ndërkohë, Vuçiq ka thënë se barrikadat do të hiqen kur të formohet Asociacioni i komunave me shumicë serbe, për të cilin është rënë dakord në kuadër të dialogut për normalizimin e marrëdhënieve midis Kosovës dhe Serbisë.

Autoritetet e shtetit të Kosovës janë kundër formimit të këtij asociacioni, me arsyetimin se në Kosovë nuk mund të ketë asociacion një etnik dhe se ai nuk është në përputhje me Kushtetutën e Kosovës./Telegrafi/