Dy nga të arrestuarit për korrupsion në Prizren: Avokat dhe punonjës i Gjykatës Themelore

Dy prej tre personave të arrestuar sot në Prizren, nën dyshimin për përfshirje në veprën penale “Ushtrim i ndikimit”, janë identifikuar si Bekim Parallangaj, avokat me veprimtari në këtë qytet, dhe Nusret Pepniku, zyrtar në Gjykatën Themelore të Prizrenit.

Personi i tretë i përfshirë në këtë rast dyshohet se është prezantuar si zyrtar i Ministrisë së Punëve të Brendshme (MPB).

Operacioni është zhvilluar nga Prokuroria Themelore në Prizren, nën udhëheqjen e kryeprokurorit Petrit Kryeziu, dhe ka përfshirë përdorimin e masave të fshehta të hetimit dhe vëzhgimit.

Sipas të dhënave nga hetimi, njëri prej të dyshuarve është kapur në flagrancë teksa i premtonte një qytetari se, në këmbim të një shumë të konsiderueshme parash, do të ndërhynte për lirimin nga paraburgimi të një personi të dyshuar për veprën penale të fajdes.