Tmerrohet familja në Skenderaj: Vajza e mitur që u zhduk dyshohet se u shfrytëzua për prostitucion

Grupet e ndryshme kriminale janë mjaft aktive në shfrytëzimin e kategorive të caktuara, kryesisht vajzave dhe të miturve, për trafikim me qenie njerëzore. Trafikantët, viktimat e tyre i shfrytëzojnë kryesisht për përfitime apo me qëllim të shfrytëzimit seksual, përkatësisht shfrytëzimit për prostitucion. Për një rast të tillë ka nisur hetimet Prokuroria Themelore në Mitrovicë, pasi një person e raportoi vajzën e tij 16-vjeçare si të zhdukur.

Burimet nga Prokuroria kanë bërë me dije se dy persona kanë përfunduar në prangat e Policisë dhe kanë dhënë detajet se si u zbulua rasti.

Fillimisht Sinjali mëson se një burrë nga fshati Makerrmal i Skenderajt, para katër ditësh ka raportuar se vajza e tij ishte larguar nga shtëpia dhe nuk kishte asnjë informacion për fatin e saj. I frikësuar se i ka ndodhur diçka, prindi ka vendosur të kërkojë ndihëm nga Policia duke e denoncuar rastin.

Në deklaratën e tij, ai ka rrëfyer se kjo nuk është hera e parë që po përballet me një situatë të tillë. Bazuar në dëshminë e dhënë para hetuesve, burimet thonë se e mitura ishte larguar edhe para një viti nga shtëpia e saj.

Si rezultat i denoncimit, Policia ka arritur të arrestojë dy persona, një 19-vjeçar dhe një 24-vjeçar që dyshohen të jenë përfshirë në këtë rast. Prokurori i Shtetit urdhëroi ndalimin e tyre për 48 orë, mbi dyshimin e bazuar se kanë kryer veprën penale “Mundësimi ose detyrimi në prostitucion”.

Në anën tjetër kërkimet për të miturën kanë vazhduar, derisa e njëjta është gjetur në lagjen Kodra e Trimave në Prishtinë dhe prej aty është dërguar në Emergjencë në Mitrovicë për t’iu nënshtruar kontrolleve, e më pas pritet të jap deklaratë para hetuesve.

Sinjali mëson po ashtu se tashmë kanë dëshmuar disa persona në lidhje me këtë rast dhe së shpejti pritet të merren edhe veprimet e tjera për zbardhjen në plotni të rrethanave në të cilat ka ndodhur ngjarja.