Sulmohet me molotov Policia e Kosovës

Në Gjakovë, dy vetura të Policisë së Kosovës janë djegur pasi një person hodhi lëndë djegëse në to. Incidenti ndodhi në parkingun e Njësisë Rajonale të Komunikacionit Rrugor.

Lajmin për Insajderin e ka konfirmuar zëdhënësi i Policisë së Kosovës për rajonin e Gjakovës, Sheremet Elezaj.

Ai tha se i dyshuari është arrestuar dhe zjarri është lokalizuar.

“Sot rreth orës 17:50, i dyshuari mashkull kosovar i moshës madhore është arrestuar pasi që i njëjti, për motive ende të panjohura, ka hudhur lëndë djegëse në disa vetura të Policisë të cilat kanë qenë të parkuara në parkingun e Njësisë Rajonale të Komunikacionit Rrugor në Gjakovë. Dy vetura janë përfshirë nga zjarri i cili është lokalizuar shumë shpejt. Lidhur me rastin është njoftuar prokurori i shtetit me vendimin e të cilit është iniciuar rast “shkaktim i rrezikut të përgjithshëm”, ka thënë Elezaj për Insajderin.