Xhafer Tahiri nuk tërhiqet nga ujdia me VV-në as pas kundërshtimit nga partia
Xhafer Tahiri nuk është tërhequr nga vendimi për lidhjen e një marrëveshje koalicioni me Vetëvendosjen në Vushtrri, ndonëse partia e tij, Lidhja Demokratike e Kosovës e kundërshtoi ashpër këtë ujdi.
Në një reagim në rrjetin social Facebook, Tahiri tha se qyteti ka nevojë për ndryshim.
“Vendimet e mëdha nuk janë asnjëherë të lehta, por pavarësisht kostove individuale, për ne një gjë është e qartë – interesi i qytetarëve dhe i Vushtrrisë është mbi gjithçka”, shkroi Tahiri në një postim në Facebook të hënën.
“Marrëveshja jonë nuk afekton asnjë garë tjetër përveç Vushtrrisë”, u arsyetua Tahiri, i cili rrezikon të futet në procedurë disiplinore nga partia pas vendimit të njëanshëm, pa lejen e LDK-së, për ujdinë e lidhur me VV-në.
Në një fotografi ku shfaqet bashkë me tetë asamblistë të zgjedhur të LDK-së në Vushtrri, ‘Xhafa’ tha se ata janë besatuar para Zotit që të sjellin “ndryshimin në Vushtrri.”
“Së bashku me asambleistët e zgjedhur të LDK-së, dje jemi besatuar para Zotit që do ta sjellim këtë ndryshim. Me ndershmëri, punë dhe dashuri për qytetin tonë”, shkroi ai
