VV-ja përzihet pak edhe në PDK: Basha e të tjerët reagojnë pas vendimit për kandidaturën e Drenasit

Kandidatura e PDK-së për kryetar të Drenasit, nuk ka shkaktuar reagime veç në partinë që drejtohet nga Memli Krasniqi.

Zyrtarë të ndryshëm të Vetëvendosjes kanë reaguar, duke i dalur në mbështetje Ramiz Lladrovcit, i cili nuk u kandidua nga kryesia e PDK-së.

Duke harruar kandidaturat e tyre që përcaktohen nga një njeri i vetëm, Dimal Basha, Nezir Kraki e Blerim Sallahu, janë përzier në zhvillimet e PDK-së.

Nezir Kraki i Guxo-s, parti e cila në shumicën e komunave nuk ka guxim as të kandidojë, është kthyer me postimet e tij të famshme “fundi”. Përderisa kohë më parë ia dha fundin Amerikës, kësaj radhe ia dha fundin PDK-së.

“Fundi i PDK-së”, shkroi ai, duke aluduar në vendimin për kandidaturën e Petrit Hajdarit në Drenas.

Dimal Basha, si zakonisht, i zëshëm për të komentuar gjithçka për partitë e tjera, por kurrë për Vetëvendosjen.

Ai ka thënë se 90% të PDK-së e kontrollon Sami Lushtakun, kurse përfshiu këtu edhe qytetarët e Ferizajt.

“Ju kam thanë që sot 90% të PDK-së e kontrollon Sami Lushtaku! Tash kur t’nalna me mendu, 11,400 ferizajli janë çu n’mengjes me fuqizu Sami Lushtakun, që sot ta përjashton Lladrovcin si kandidat të PDK-së, veç sepse nuk e lejon me zhvat! Nginu tash PDK!”, ka shkruar Basha.

E vulën këtyre reagimeve nga VV-ja ia dha ‘vaji në tepsi’. Blerim Sallahu ka shkruar se lista e PDK-së për kandidatura është hartuar në Skënderaj.

“Lista e kandidatëve për kryetarë komunash nga radhët e subjektit politik PDK është hartuar në Skenderaj, ndërsa është votuar në Prishtinë!”, tha ai.

Këto reagime erdhën pasi kryesia e PDK-së, me 26 vota vendosi që Petrit Hajdari të jetë kandidat për Drenas.

Me votë dërmuese në favor të tij, Petrit Hajdari është kandidat i Partisë Demokratike të Kosovës për kryetar të Komunës së Drenasit në zgjedhjet lokale të tetorit.

Burime të gazetës ‘Nacionale’ tregojnë se peshorja mes Ramiz Lladrovcit dhe Petrit Hajdarit ka anuar fort në anën e këtij të fundit në mbledhjen e Kryesisë së Partisë Demokratike të Kosovës.

Në këtë mbledhje u vendos përfundimisht se Lladrovci s’do të ketë vulën zyrtare të PDK-së për të kandiduar për kryetar të Komunës së Drenasit, por rivali i tij Petrit Hajdari.

26 vota në mbështetje dërrmuese kanë qenë në favor të Petrit Hajdarit, ndërsa vetëm 4 për Ramiz Lladrovcin. Një votë ka rezultuat e pavlefshme.

Ramiz Lladrovci qe disa muaj me radhë ka pasur tone të mprehta dhe konfrontuese se nuk do të lejojë kandidaturë tjetër nga Partia Demokratike e Kosovës për të garuar në Drenas, përpos vetes.

“Nuk ka bir nane që më largon nga PDK-ja”, është një lajtmotiv që Lladrovci e ka përsëritur disa herë në një seri paraqitjesh televizive.

Lladrovci dje në një reagim në faqen e vet, pati thirrje ndaj Kryesisë së PDK-së që të reflektojnë dhe të miratojnë kandidaturën e vet.

Kryetari i Drenasit madje e quajti “të papritshme” që në rend të parë emri i tij të vendosej “në garë” për t’u shqyrtuar nga Kryesia.

“Vendosja e emrit tim në garë, për tu zgjedhur nga anëtarët e Kryesisë së PDK-së, pa marrë parasysh sukseset e komunës dhe punës së shkëlqyer të degës, nuk ishte e pritshme për qytetarët e bastionit të PDK”, shkroi ai,

“Anëtarët e Kryesisë pres të mos jenë të ndikuar nga keqbërësit. Mospjesëmarrja në votim për kandidatin për degën e Drenasit do të ishte argument se janë kundër bedelëve. Asnjë anëtarë të Kryesisë nuk e kam kontaktuar rreth votimit, sepse, pres të mos jenë pjesë e padrejtësisë”.

Për më tepër, Lladrovci i kujtoi Kryesisë së PDK-së që në rast të zgjedhjes së kandidatit tjetër, duhet të kihen parasisheh implikimet që pasojnë.