Vriten katër derra të egër në Kamenicë, arrestohet një person

Gjuetia e paligjshme është një fenomen që me sa duket, nuk zhduket lehtë në vendin tonë. Gjuajtja e kafshëve të egra dhe mbytja e tyre përbën vepër penale, nëse kryhet në territorin ku është e ndaluar dhe pa leje përkatëse.

Por një gjë e tillë ka ndodhur së fundmi në fshatin Kranidell të Kamenicës, ku një grup i gjahtarëve kanë vrarë katër derra të egër.

Lejen për gjueti ata e kanë marrë nga shoqata ‘Vendgjuetia Kamenincë’, edhe pse në atë pjesë nuk lejohet gjuetia.

Burimet e Sinjalit nga Prokuroria kanë bërë me dije se personi që ka lëshuar lejen është përgjegjësi i kësaj shoqate, i cili tashmë është arrestuar. Sipas informacioneve të para i njëjti iu ka dhënë leje grupit të gjahtarëve, ndonëse nuk është pajisur me leje nga ministria.

Pasi Policia është vënë në dijeni për rastin, ka prangosur të dyshuarin, i cili e ka pranuar veprën për të cilën i njëjti dyshohet. Ndaj tij, Prokurori i Shtetit ka urdhëruar dorëzimin e kallëzimit penal për veprën penale “Keqpërdorim i detyrës apo autoritetit zyrtare”.