Tri aksidente të njëpasnjëshme në rrugën Gjilan-Prishtinë, përfshihet edhe një veturë e policisë
Mëngjesi i sotëm ka nisur me aksidente përgjatë rrugës Gjilan-Prishtinë.
Indeksonline raporton se në këtë aks rrugor kanë ndodhur tri aksidente në tri lokacione të ndryshme.
Në njërin prej tyre madje është përfshirë edhe një veturë e Policisë së Kosovës.
Një nga aksidentet ka ndodhur mes Mramorit dhe Slivovës.
Në anën tjetër, në fshatin Ponesh është aksidentuar vetura e policisë.
Indeksonline raporton se vetura në fjalë është vetaksidentuar, duke përfunduar e rrotulluar.
Detaje për këtë vetaksident ka dhënë edhe zyrtari i Policisë për Rajonin e Gjilanit, Valon Osmani.
Osmani ka deklaruar për Indeksonline se vetaksidenti në fjalë ka ndodhur rreth orës 07:08 afër udhëkryqit të fshatit Ponesh, dhe se shkak kanë qenë kushtet e papërshtatshme të rrugës.
“Hetues policor të aksidenteve nga njësiti rajonal i komunikacionit rrugor në Gjilan kanë dalë në vendin e ngjarjes dhe po merren me rastin. Në bazë të hetimeve të para dyshohet se deri tek vetaksidenti ka ardhur si pasojë e kushteve të rrugës me ngrica të shkaktuara nga një rrjedhje e ujit në atë pjesë. Me këtë rast lëndime trupore nuk ka pësuar askush vetëm janë shkaktuar dëme materiale ne automjet” pohoi Osmani.
