Të dyshuarit për vrasjen e policit Muhamet Lika ende në arrati, Policia po mundohet t’i identifikoj

Polici i Kosovës, Muhamet Lika u vra mbrëmjen e së martës në shkallët e ndërtesës ku po banonte në Kaçanik.
Në lidhje me vrasjen e tij, kryeprokurori i Prokurorisë Themelore në Ferizaj, Burim Çerkini ka thënë se janë dy të dyshuarit.

Të dyshuarit që nga e marta, vazhdojnë të jenë në arrati dhe ende nuk janë identifikuar nga Policia e Kosovës.

Dje (e mërkurë), kryeprokurori Çerkini në një konferencë për media ka dhënë detaje në lidhje me rrjedhën e hetimeve dhe informacionet e deritanishme.

Ai ka thënë se në bazë të provave materiale, aktin e kanë kryer dy persona dhe janë larguar nga vendi i ngjarjes, shkruan lajmi.net.

“Gjatë punës hetimore, dje dhe sot nga PK janë ndërmarrë shumë veprime hetimore, janë intervistuar shumë persona, dëshmitar, persona që kanë rastis në vendin e ngjarjes, që mund të japin informacione për organet e rendit, si dhe janë ndërmarr të gjitha veprimet për sigurimin e provave materiale që do të na bëjnë neve punën më të lehte. Prokurori kujdestar në Prokurorinë Themelore në Ferizaj, ka qenë në vendin e ngjarjes dhe të gjitha veprimet kanë qenë të marra në koordinim me të”, ka thënë Çerkini.

Në lidhje me motivin e vrasjes, ai ka thënë se nuk mund të ketë qenë grabitje por se qëllimi i dorasëve ishte vrasja e rreshterit Lika.

“Më sigurinë më të madhe mund të themi se nuk ka të bëjë me pistën e grabitjes. I ndjeri pas kryerjes së punës ka qenë duke u kthyer në banesën e tij. Nuk ekziston ndonjë pistë që të dyshuarit kanë pas qëllim grabitjen. Ajo shihet apo vërehet qartë që qëllimi i tyre ka qenë ekzekutimi ” rëndë. Në vendin e ngjarjes nuk ka pas ndonjë institucion mikrofinanciar, është zonë vendbanim dhe nuk ka institucione që mund të kenë qenë cak i grabitjes”, ka thënë ai.

Lexo edhe:  Trusti të enjten në Kuvend

Çerkini ka thënë se viktima ka marrë vetëm një goditje e cila ka qenë tejshpuese dhe se i njëjti nuk ka pas veshur antiplumb.

Se a ka qenë e organizuar, ai ka thënë se nuk mund me saktësi ta themi por nga ajo që shihet që kanë qenë dy persona mund të themi që ka qenë e organizuar.

Rasti ka ndodhur në shkallët e ndërtesës dhe sipas Çerkinit, ajo që shihet deri më tani nuk ka njohuri apo nuk kemi të dhëna që është përcjell qoftë nga vendi I punës apo coftë e kanë pritur në hyrje të banesës.

Ai ka thënë se Likajt, në vitin 2021 i është djegur një lokal e të dyshuarit për këtë rast ende nuk janë identifikuar.

“Në vitin 2021 është djegur lokali i të ndjerit, por deri më tani nuk kemi mundur t’I ndërlidhim motivet apo arsyet apo ndonjë shkak që do të ishte djegia e lokalit me pjesën e vrasjes. Por në të dyja rastet kemi të njëjtin të dëmtuar por nuk kemi ndonjë lidhje mes tyre ende”, ka thënë Çerkini.

Prokurori kujdestar nga ky rast ka ftuar qytetarët e Kosovës, gjegjësisht ata të Kaçanikut që të jenë në të njëjtën vijë me Policinë dhe për çdo informacion ta njoftojnë Policinë e Kosovës dhe Prokurorinë Themelore në Ferizaj.

Rreshteri Likaj, është varrosur dje (e mërkurë) tek varrezat e veteranëve në Kaçanik.