Shoferi tejkalon në vijë të plotë në Gjilan, shkakton aksident – dy të lënduar

Numri i madh i aksidenteve në trafik po vazhdon të jetë shqetësues. Çdo ditë raportohet për aksidente të shumta në komunikacion dhe në të shumtën e rasteve shkaktohen si pasojë e pakujdesisë së shoferëve gjatë vozitjes, duke rrezikuar kështu jetën e tyre dhe të pjesëmarrësve tjerë në trafik.

Një aksident mes dy veturave ka ndodhur edhe mbrëmë në rrugën “Adem Jashari” në Gjilan, ku janë përfshirë dy vetura, raporton Sinjali.

Sinjalizuesit e Sinjalit thonë se aksidenti erdhi pasi i dyshuari ka bërë tejkalim në vijë të plotë, duke goditur kështu veturën tjetër, e cila ishte kyçur në rrugën kryesore. Për pasojë, përveç dëmeve, të lënduar kanë mbetur dy persona.

Shoferi i njërës veturë bashkë me pasagjerë kanë pësuar lëndime, me ç’rast janë dërguar në Spitalin e Gjilanit për trajtim mjekësor, ndërkohë që në vendin e ngjarjes ka dalë edhe Policia.