Përleshje në Suharekë: Dy vëllezër kapen me një tjetër – dëmtojnë makinat, ndalohen dy persona
Mosmarrëveshjet mes qytetarëve shpesh herë përcillen me ofendime e të shara kundrejt njëri-tjetrit. Në raste të caktuara, situata eskalon edhe në dhunë fizike mes tyre, duke u dashur me doemos ndërhyrja e Policisë për të zgjidhur problemet, raporton Gazeta Sinjali.
Një fjalosje e mëhershme ka përfunduar me përleshje fizike dhe dëmtim të veturave, në një rast të ndodhur mbrëmjen e së shtunës në Suharekë.
Sipas informacioneve të Gazetës Sinjali, ngjarja ka ndodhur në rrugën Skënderbeu, ku tre të dyshuar – u përfshinë në një konflikt fizik dhe dëmtim prone.
Burimet e Gazetës Sinjali tregojnë se dy nga të dyshuarit, që janë edhe vëllezër e kanë ndalur në rrugë të dyshuarin e tretë, pas një konflikti të mëparshëm dhe e kanë sulmuar fizikisht.
Por tensioni nuk përfundoi aty.
Personi që u sulmua, në shenjë revolte e ka dëmtuar makinën e vëllezërve nga Suhareka, sikur më pas kanë bërë edhe këta të fundit – e kanë dëmtuar veturën e personit me të cilin u përfshinë në përleshje.
Fatmirësisht, nuk raportohet për lëndime trupore, por vetëm për dëme materiale.
Pas konsultimit me Prokurorin e Shtetit, është marrë vendimi që dy vëllezërit të ndalohen për 48 orë, ndërsa rasti është iniciuar për “Sulm” dhe “Dëmtim prone”.
Hetimet për rastin vazhdojnë.
