Parashikimi i motit gjatë vikendit

Sot pritet të mbajë mot plotësisht i vranët dhe me reshje shiu, shqote, bore dhe mundësi për shi të ngrirë. Nganjëherë priten reshje të dendura atmosferike kryesisht në formë dëbore, por gjatë ditës ose pasdite nëpër ultësira lokalisht mund të përzihen me shi dhe shi të akullt. Reshjet më intensive priten në juglindje të Kosovës ku në rajonin e Brezovicës parashihen reshje intensive dhe shtresa të mëdha bore.

Në Shqipëri, Maqedoninë Veriore, Luginë të Preshevës dhe Mal të Zi të Shtunën pritet të mbajë mot me vranësira të dendura dhe reshje të dendura shiu, shqote e bore. Reshjet mjaft të dendura shiu-bore priten në Maqedoninë e Veriut, ndërsa në malet e këtij vendi priten intervale reshjesh mjaft të dendura të borës. Nëpër ultësira reshje të përziera.

Edhe në Shqipëri priten reshje të herëpashershme shiu e bore, ndërsa reshjet më të dendura priten në juglindje të Shqipërisë dhe disa zona në lindje të vendit. Në lindje dhe juglindje lokalisht priten edhe intervale reshjesh të dendura bore.

Të dielen intensiteti i reshjeve do të vjen duke u dobësuar, por ende priten reshje shiu, shqote e bore.

Sistemi masiv ciklonik që do të sjellë këto reshje do të dobësohet dhe largohet krejtësisht të hënën kur pritet të kemi stabilizim të motit./MeteoBallkan