Oficerë të FSK-së diplomojnë në Republikën e Shqipërisë

Në ambientet e amfiteatrit të Ministrisë së Mbrojtjes së Republikës së Shqipërisë, Kolegji i Mbrojtjes dhe Sigurisë ka organizuar ceremoninë e diplomimit të kursantëve të Kursit të Komandës dhe Shtabit të Përgjithshëm dhe Kursit të Lartë të Oficerit.

Siç njofton Ministria e Mbrojtjes së Kosovës, programet e këtyre kurseve ofrojnë dhënien e njohurive të nevojshme për planifikimin dhe drejtimin e operacioneve luftarake në një mjedis operacional kompleks që lidhet me sigurinë kombëtare, aftësimin për të marrë vendime të drejta dhe për të dhënë këshilla të sakta në rastet kur shqyrtohet përdorimi i forcës ushtarake.

Në këtë ceremoni në Kursin e Komandës dhe Shtabit të Përgjithshëm (KKSHP) kanë diplomuar 4 oficerë nga FSK-ja si dhe në Kursin e Lartë të Oficerit (KLO) 2 oficerë.

Ministria e Mbrojtjes së Kosovës tha se FARSh, në kuadër të bashkëpunimit me Forcën e Sigurisë së Kosovës, po ndihmojnë në ngritjen e kapaciteteve profesionale në të gjitha nivelet e edukimit ushtarak.