Nën kërcënimin e thikës ia grabitën një burri zinxhirin e arit dhe një orë dore, arrestohen dy të dyshuar në Gjilan

E.D (23-vjeç) dhe A.I (23-vjeç) janë arrestuar në Gjilan nën dyshimin se nën kërcënimin e sëpatës dhe thikës, ia kishin grabitur viktimës zinxhirin e arit dhe një orë dore.
Në njoftimin e Policisë, thuhet se Njësiti i Hetimeve Rajonale nga Drejtoria Rajonale e Policisë në Gjilan, të dielën si rezultat i ndërmarrjes së veprimeve të shpejta dhe efikase operative e hetimore, ka arritur që të identifikojë, lokalizojë dhe arrestojë dy të dyshuarit.

“Rasti kishte ndodhur një ditë më parë me datën 18.01.2024, ku të dyshuarit nën kërcënimin e mjeteve të mprehta (sëpatë dhe thikë), i kanë grabitur viktimës mashkull kosovar një zinxhir qafe nga ari dhe një orë dore. Të dyshuarit pas arrestimit janë intervistuar në prezencën e avokatëve mbrojtës dhe me vendim të Prokurorit të Shtetit janë ndaluar në qendrën e mbajtjes për 48 orë”, thuhet në njoftim.

Sipas Policisë, rasti me kallëzim penal procedohet në Prokurorinë Themelore.