Mërgimtari që e kërcënoi Hotin, i kërkon falje publike: “Gjunjëzohem para jush”
Deputeti i LDK-së, Avdullah Hoti, është përballur sot në gjykatë me mërgimtarin që e kërcënoi para pak ditësh në rrjete sociale.
Mërgimtari me emrin Reshat Sadiku e kishte kanosur deputetin Hoti, duke i thënë se “ty more bugar veç kosa të vjen hakësh”.
E sot mërgimtari Sadiku i ka kërkuar falje deputetit Hoti. I ka thënë se nuk ka pasur ndonjë qëllim pasi “nuk është i këtyre punëve”.
“Për shkak se edhe vetë kam pasur kanosje, internetin nuk e përdori shumë edhe nuk e kam fshi komentin. Për kanosjen, kërkoj falje publike me gjithë zemër, nëse ka diçka për ndihmë nga ana ime, jam i gatshëm. Kërkoj falje…”, tha ai.
I njëjti tha se nuk është person që bën të tilla veprime, raporton “Betimi për Drejtësi“.
“Kam kontribu shumë, tash më ndodhi kjo. Me të vërtetë gjunjëzohem para jush, se nuk jam njeri i tillë, kurrë në gjyq s’jam kanë as kurrë këso probleme s’kam pas”, tha i akuzuari.
Ndërsa, edhe deputeti Hoti i tha se ai është i pari që e ka sjellë në gjykatore.
“Ti ke qenë i pari që më ke sjellë këtu, kurrë s’kam qenë këtu”, tha Hoti.
