Identifikohen autorët, çka dihet deri më tani për plagosjen në orët e natës në Prishtinë
Mbrëmjen e së hënës, rreth orës 20:20, në rrugën “Qamil Hoxha” në Prishtinë janë dëgjuar të shtëna me armë zjarri.
Nga Policia e Kosovës, i kanë thënë gazetës online Reporteri.net se bëhet fjalë për dy të plagosur njëri prej të cilëve dyshohet se pësoi lëndime nga arma e zjarrit.
“Rreth orës 20:20, policia ka marrë informatën për të shtëna me armë në rrugën Qamil Hoxha në Prishtinë. Bazuar në informacionet e para raportohet për dy persona të lënduar, njëri nga ta dyshohet të ketë marrë lëndime nga arma e zjarrit”, tha zëdhënësja e policisë, Flora Ahmeti.
“Personat e lënduar janë dërguar për trajtim mjekësor. Hetuesit policor në koordinim me prokurorinë, po ndërmarrin veprimet hetimore për ndriçimin e plotë të rastit dhe janë në kërkim të personave të dyshuar të cilët tashmë janë identifikuar nga ana e policisë”, thanë nga policia.
Të plagosurit mbrëmjen e së hënës në rrugën “Qamil Hoxha” në Prishtinë i përkasin moshës 20 dhe 22 vjeçare.
Të dytë, janë duke u trajtuar në Emergjencën e QKUK’së.
Gjendja e tyre është stabile, konfirmoi drejtori i Emergjencës, Naser Syla.
Njëri nga ta është i plagosur me armë zjarri e tjetri me mjet të mprehtë.
“Njëri është I plagosur me armë zjarri ndërsa tjetri me mjet të mprehtë. Gjendja është stabile e të dyve. Pas ekzaminimeve të kryera, I plagosuri me armë zjarri do të pranohet në kliniken e Ortopedisë për trajtim të mëtutjeshëm, kurse tjetri do të lëshohet për trajtim në shtëpi”, tha Syla.
Të dyshuarit për këtë rast janë identifikuar dhe Policia është në kërkim të tyre.
