Historia kriminale e ‘Kinezit’ nga Peja që u shpall në kërkim: Disa herë ishte arrestuar për drogë e incidente tjera

I dyshuari që e shkaktoi aksidentin me fatalitet në Pejë, ku e goditi për vdekje një këmbësor dhe iku nga vendi i ngjarjes akoma nuk ka rënë në prangat e Policisë. Gazeta Sinjali raportoi të dielën ekskluzivisht se bëhet fjalë për Aaron Rexhajn, 24-vjeçar, identiteti i të cilit u konfirmua edhe nga Policia, pasi i njëjti është shpallur në kërkim. Rexhaj është emër I njohur për organet e rendit, si pasojë e të kaluarës së tij kriminale.

Por cilat janë veprat për të cilat Rexhaj dyshohet se i ka kryer ndër vite?  

Gazeta Sinjali sjellë vetëm disa nga rastet për të cilat dyshohet Aaron Rexhaj, i cili qysh në të 20-at ka qenë i përfshirë në incidente të ndryshme, për çka edhe është arrestuar nga Policia.

Rexhaj i njohur me nofkën “Kinezi” është shpallur dy herë në kërkim. Rasti i fundit është për aksidentin me fatalitet në Pejë, që ndodhi të shtunën pas mesnate, ku goditi për vdekje 41-vjeçarin Shpejtim Gashi, me veturën që e kishte marrë me qira në një “Rent a Car”.

Me shpresën që mund të shpëtojë nga prangat e Policisë, Rexhaj u zhduk atë natë dhe akoma nuk është lokalizuar vendndodhja e tij, përkundër që njësitet përkatëse të Policisë janë vënë në ndjekje të tij.

“Kinezi” ishte arrestuar në muajin shtator për drogë

I riu që po kërkohet nga Policia, dyshohet për vepra penale për narkotikë, për çka edhe kishte ëprfunduar në ndalim policor, në fund të muajit shtator.

Rexhaj bashkë me dy persona të tjerë, bashkëmoshatarë të tij, më 27 shtator ishin arrestuar pasi u kapën me një sasi të substancës narkotike, të llojit marihuanë.

Edhe këtë herë, 24-vjeçari kishte tentuar arratisjen, ashtu që teksa ishin në lëvizje me një veturë, posa kanë vërejtur Policinë kanë tentuar të ikin – por pa rezultat. Duke bërë lëvizje të pakontrolluara, ata kishin rënë me veturë në një kanal dhe kështu u kapën nga Policia.

Pas kontrollit policor, atyre iu gjet një qese me marihuanë, që ishte sekuestruar dhe të njëjtit kanë përfunduar në stacion policor.

“Kinezi” dhe dy shokët e tij të dyshuar qëndruan në ndalim policor për 48 orë, nën dyshimet për veprën penale “Posedim i paautorizuar i narkotikëve, substancave psikotrope apo analoge”.

Rasti tjetër në muajin maj – futja në sherr me Policinë

Përveç drogës, Aaron Rexhaj dyshohet edhe për një incident që kishte ndodhur në fillim të muajit maj, të këtij viti, në Spitalin Rajonal të Pejës.

24-vjeçari dhe një shok i tij, i moshës së mitur, dyshohet se ishin përfshirë në një përleshje më 8 maj dhe si pasojë e lëndimeve janë dërguar në spital, ku kishin refuzuar trajtimin mjekësor.

Si rezultat i hallakamës që ishte krijuar, Policia kishte intervenuar në vendin e ngjarjes, ku edhe plasi sherri, pasi dy të dyshuarit u kapën me zyrtarët policorë.

Sipas informacioneve që ka Sinjali, fillimisht shoku i Rexhajt i kishte kërcënuar me vrasje policët, e madje kishte tentuar edhe që t’i sulmojë. Por Policia ka arritur që ta arrestojë të njëjtin, megjithatë punë iu kishte dalë edhe me “Kinezin”.

Ky i fundit e kishte penguar Policinë në kryerjen e detyrave dhe prangosjen e mikut të tij, veprime këto që i kushtuan edhe atij me arrestim.

Të dy përfunduan në ndalim policor dhe ndaj tyre ishte iniciuar rasti dhe kishin filluar hetimet me urdhër të Prokurorit të Shtetit.

I shpallur në kërkim edhe në vitin 2021

Ndonëse i ri në moshë, Rexhaj në vazhdimësi është përfshirë në veprimtari të kundërligjshme.

Ai ishte shpallur në kërkim edh enë vitin 2021 dhe kërkohej për veprën penale “blerje, posedim, shpërndarje dhe shitje të paautorizuar të narkotikëve, substancave psikotrope ose analoge”.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.