“Hin n’kerr se po ta q* nanën” – Dy persona fyejnë dhe sulmojnë zyrtarin policor në Prishtinë

Konfliktet në trafik janë goxha të shpeshta në vendin tonë dhe jo rrallëherë eskalojnë në kërcënime serioze. Në një rast të tillë është përfshirë gjatë ditës së djeshme një pjesëtarë i Policisë së Kosovës.

Sinjali mëson se e gjithë ngjarja ka ndodhur në rrethrrotullimin në rrugën ‘Tirana’ në Prishtinë, ku derisa po voziste veturën zyrtare, polici ka hasur në dy qytetarë të cilët i kanë kaluar afër me veturë dhe më pas janë ndalur e i janë drejtuar me fyerje.

Sipas burimeve, të dyshuarit kanë kërkuar llogari nga zyrtari policor, se përse s’iu ka dhënë përparësi për t’u kyçur në rreth rrotullim e më pas njëri nga ta e ka sharë dhe i ka kërkuar që të futet në veturë, ndërsa tjetri e ka goditur dhe e ka kërcënuar.

Polici ka kërkuar ndihmë mjekësore në spital, ndërkohë që 39-vjeçari është shoqëruar në stacion policor ku është intervistuar lidhur me rastin.

Me urdhër të prokurorit, ndaj tij është iniciuar rasti për veprën penale ‘Sulm ndaj personit zyrtar’.