Ferizajasit i futen hajnat në shtëpi: Ia vjedhin motorin e 10 mijë eurove dhe armën me municion

Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, që po shkaktojnë ankth e pasiguri, sidomos kur shtëpitë mbesin pa përkujdesje. Kështu e ka pësuar një familje në Ferizaj, raporton Gazeta Sinjali.

Sinjali mëson se një vjedhje e rëndë ka ndodhur në një shtëpi në rrugën “Epopeja e Jezercit” në Ferizaj ku persona të panjohur kanë marrë gjëra me vlerë.

Sinjali mëson se hajnat kanë hyrë brenda shtëpisë dhe kanë marrë një motor që kap vlerën e rreth 10 mijë eurove, si dhe një armë me municion.

Burimet brenda Prokurorisë kanë bërë me dije për Sinjalin se vjedhja është denoncuar nga pronari i shtëpisë, i cili ka kërkuar ndihmën e Policisë

Si rezultat i denoncimit, njësitë policore kanë dalë në vendin e ngjarjes ku kanë kryer ekzaminimet e nevojshme që ndihmojnë në zbardhjen e rrethanave të rastit.

Me urdhër të prokurorit, rasti është iniciuar ‘Vjedhje e rëndë’, ndërsa veprimet tjera ligjore do merren posa të kapen të dyshuarit.