Begaj reagon pas kidnapimit të tre policëve: Akt i rëndë provokativ për destabilizimin e Kosovës dhe mbarë rajonit

Presidenti i Shqipërisë, Bajram Begaj ka dënuar aktin e rrëmbimit të tre policëve të Kosovës nga forcat serbe.

Sipas Begajt, ky është një akt i rëndë provokativ për destabilizimin e Kosovës dhe mbarë rajonit.

Ai i ka bërë thirrje autoriteteve serbe për lirimin e policëve kosovarë dhe ndërhyrjen e partnerëve ndërkombëtarë.

Ndër të tjerash, Begaj gjithashtu i ka bërë thirrje Kosovës që të mos bien pre e provokimeve dhe kësisoj të koordinohen me ShBA-të dhe BE-në për rikthimin në dialig.

Deklarata e presidentit:

Rrëmbimi i tre efektivëve  të Policisë së Kosovës Brenda territorit Kosovar nga trupat serbe është një akt i rëndë provokativ për destabilizimin e Kosovës dhe mbarë rajonit. E dënoj me forcë këtë akt dhe i bëj thirrje autoriteteve serbe për lirimin e efektivëve kosovarë. Gjithashtu iu bëj thirrje partnerëve ndërkombëtarë që të ndërhyjnë dhe të shkurajojnë veprime të tjera të ngjashme.

Një thirrje vëllazërore e bëj sërish për autoritetet e Kosovës për të mos rënë pre e provokimeve dhe për të dhënë kontributin e tyre për çensionimin e situatës. Koordinimi me ShBA dhe BE për rikthimin në tryezën e dialogut është tepër i rëndësishëm.