Avokati serb publikon pamje ku thotë se Vuçiqi shihet me snajper gjatë rrethimit të Sarajevës
Avokati serb u referohet raportimeve ndërkombëtare për “Safarin e Snajperëve” dhe publikon pamje të Vuçiqit nga vitet ’90, ndërsa prokuroria serbe ende nuk ka nisur hetime.
Avokati serb Çedomir Stojkoviq ka reaguar mbi raportimet e fundit të mediave botërore për të ashtuquajturin “Safari i Snajperëve”, një aktivitet i pretenduar kriminal që dyshohet të jetë organizuar nga strukturat e lidhura me Radovan Karaxhiqin dhe Ratko Mlladiqin gjatë rrethimit të Sarajevës (1992–1996). Sipas këtyre raportimeve, një prokuror italian ka hapur hetime paraprake lidhur me vrasje të kryera “rekreativisht” ndaj civilëve.
Në këtë kontekst, Stojkoviqi ka publikuar pamje të vjetra ku presidenti aktual i Serbisë, Aleksandar Vuçiq, shfaqet duke mbajtur pushkë ose snajper në zonat kodrinore rreth Sarajevës gjatë periudhës së luftës. Avokati pretendon se këto pamje përforcojnë dyshimet për aktivitetet e asaj kohe, megjithëse nuk ka prova të konfirmuara nga autoritetet hetimore.
Deklarata të ngjashme janë bërë edhe më herët. Vitin e kaluar, ministri i Mbrojtjes i Bosnje-Hercegovinës, Zika Helez, akuzoi Vuçiqin se kishte qëlluar ndaj civilëve në Sarajevë — pretendime të cilat Beogradi i ka mohuar kategorikisht dhe që nuk janë hetuar zyrtarisht.
Sipas Stojkoviqit, pavarësisht publikimeve dhe rritjes së interesit ndërkombëtar, prokuroria publike në Beograd nuk ka hapur ndonjë hetim. Ai citon mediat që raportojnë se “Safari i Snajperëve” dyshohet të jetë organizuar si aktivitet i paguar, ku vrasës të ardhur në Beograd dhe pjesëtarë të ushtrisë serbe në kodrat përreth Sarajevës kryenin gjuajtje me snajper kundrejt një tarife.
Pretendimet aktualisht janë objekt hetimesh ndërkombëtare dhe nuk janë konfirmuar nga organet zyrtare serbe.
