Aksidenti me fatalitet në Pejë: 43-vjeçari që u lëndua ndodhet në gjendje kritike në QKUK
Dita e shtunë ishte e kobshme për familjen Shala në Pejë. Në aksidentin me fatalitet që ndodhi në fshatin Ozdrim, mbetën të vdekur dy këmbësorë, anëtarë të kësaj familje, ndërkaq një person tjetër, nga e njëjta familje është lënduar rëndë. Fadil dhe Avdi Shala humbën jetën tragjikisht, teksa personi që pësoi plagë të rënda ndodhet në Qendrën Klinike Universitare, raporton Gazeta Sinjali.
Burimet brenda QKUK-së kanë bërë me dije se gjendja e 43-vjeçarit po vazhdon të jetë e rëndë dhe i njëjti iu është nënshtruar intervenimeve mjekësore, posa është dërguar në këtë qendër nga Spitali Rajonal i Pejës.
Ndërkaq dy familjarët e tij, nuk arritën t’iu bënin ballë plagëve dhe vdiqën në vendin e ngjarjes.
Avdi dhe Fadil Shala
Rastin e ka konfirmuar mbrëmë për Sinjalin edhe zëdhënësi i Policisë së Kosovës për Rajonin e Pejës, Driton Rugova, i cili tha se shoferi që dyshohet se shkaktoi aksidentin është shoqëruar në stacion policor.
“Rreth orës 21:30 Policia është informuar për një aksident trafiku në fshatin Ozdrim të Pejës. Në aksident kanë qenë të involvuara një veturë dhe tre këmbësorë, dy prej të cilëve kanë rezultuar me fatalitet. Vdekjen e ka konstatuar ekipi mjekësor në vendin e ngjarjes, ndërsa i lënduari është dërguar në Spitalin Rajonal të Pejës. Personi që dyshohet se ka shkaktuar aksidentin është shoqëruar në stacion policor”, tha Driton Rugova për Sinjalin.
Lidhur me rastin janë deklaruar edhe nga Prokuroria Themelore në Pejë, me ç’rast është bërë e ditur se brenda afatit ligjor do të ndërmerren veprimet e nevojshme.
16 shtatori shënoi një ditë të kobshme për Kosovën, pasi brenda pak orësh kanë ndodhur tri aksidente me fatalitet, një në Podujevë, një në Graçanicë dhe ky rast në Pejë.
Kujtojmë se në vazhdimësi bëhet thirrje për kujdes në komunikacion, pasi rastet e aksidenteve me fatalitet nuk po kanë të ndalur dhe shkaktarët më së shpeshti janë moszbatimi i rregullave.
