Hyri në rreth rrotullim nga ana e kundërt dhe ishte nën ndikim të alkoolit, gjobitet gjilanasi

Policia e Rajonit të Gjilanit ka ndaluar shoferin i cili kishte hyrë në rreth rrotullim nga ana e kundërt, duke shkaktuar edhe kundërvajtje “Shkaktim i rrezikut të përgjithshëm”, e ku i njëjti ka rezultuar të ishte edhe nën ndikim të alkoolit.

Policia e ka gjobitur me 200 euro, konfiskim të patent-shoferit me masën e përkohshme e ndalim të vozitjes në afat prej tre muajsh dhe dy pikë negative, si dhe automjeti i është konfiskuar përkohësisht.

“Drejtoria Rajonale e Policisë në Gjilan, apelon vozitësit që të i respektojnë normat dhe ligjet e trafikut rrugor, po ashtu inkurajon mediat dhe qytetarët që për të gjitha kundërvajtjet që mund të shkaktohen në komunikacion, të njoftojnë Stacionin më të afërm të Policisë, apo përmes aplikacionit digjital “Lajmëro Policinë’’, E-mail: [email protected] dhe numrat kujdestarë:192; 03850807001. Të dhënat e juaja do të ruhen ne konfidencialitet të plotë”, thuhet në njoftim.