40 vjet burgim ndaj Ilir Gjokajt, vrau ish-bashkëshorten 19-vjeçare dhe plagosi babain e saj

Ilir Gjokaj u dënua me 40 vjet burg për vrasjen e Shejla Bakijës (19-vjeçare) dhe plagosjen e babait të saj Shabanit, të kryer në shtator të vitit 2021, në fushën e Karabushkos në Tuzi.

 

Gjykata e shkallës së parë në Podgoricë e dënoi Gjokajn me 40 vjet burgim për vrasje të rëndë, katër vjet për vrasje në tentativë dhe plagosje të Shaban Bakijës dhe një vit burg për armëmbajtje pa leje.

Pas kësaj, gjykata vendosi një dënim të unifikuar me 40 vjet burgim.

Aktgjykimin e shkallës së parë e shpalli kryetari i këshillit, gjyqtari Veljko Radovanoviq, shkruan sot Vijesti.me. Ai në shpjegimin e aktgjykimit tha se Gjokaj e ka vrarë Shejla Bakijën për motive të ulëta dhe egoiste.

Sërgjan Leshkoviq, avokati mbrojtës i Gjokajt, u tha gazetarëve pasi gjykata shpalli vendimin sot, se aktgjykimi është sjellë nën presion dhe se gjykatat i marrin vendimet e tilla lehtë. Ai theksoi se në këtë procedurë nuk është paraqitur asnjë provë e mbrojtjes.

Ai shtoi se gjykata i hodhi poshtë të gjitha provat e mbrojtjes.

“Sigurisht që mbrojtja do të parashtrojë ankesë, aq më tepër që çdo kërkesë për paraqitjen e provave është refuzuar. Besoj se provat që i kemi propozuar, nëse do t’i kishim paraqitur, aktgjykimi me siguri do të ishte ndryshe”, përfundoi Leshkoviq.

Avokatja Tijana Zhivkoviq, përfaqësuese e familjes së viktimës, u tha gazetarëve se aktgjykimi është një lloj satisfaksioni për familjen. Ajo beson se aktgjykimi është i bazuar në prova.