Prokuroria ngrit aktakuzë ndaj çiftit për sulmin fizik ndaj dy gazetareve në Prishtinë
Prokuroria e Shtetit ka ngritur aktakuzë ndaj çiftit të cilët kanë sulmuar fizikisht dy gazetare në Prishtinë.
Lajmin e ka konfirmuar zëdhënësja e Prokurorisë Themelore në Prishtinë, Laureta Ulaj.
Prokuroria ndaj të pandehurës, M.B ka ngritur aktakuzë me propozim për caktimin e masës së arrestit shtëpiak në drejtim të veprave penale “Kanosja” dhe “Sulmi”, ndërkaq në këtë aktakuzë është i përfshirë edhe i pandehuri A.L., i cili ngarkohet me veprën penale “Sulmi”.
“Lidhur me këtë rast, ju njoftojmë se Prokurori i Shtetit, pranë gjykatës kompetente, ka ngritur aktakuzë me propozim për caktimin e masës së arrestit shtëpiak ndaj të pandehurës M.B., në drejtim të veprave penale ‘Kanosja’ dhe ‘Sulmi’, sipas KPRK-së. Gjithashtu, ju njoftojmë se në këtë aktakuzë është i përfshirë i pandehuri A.L., i cili ngarkohet me veprën penale ‘Sulmi’, sipas KPRK-së”, thuhet në përgjigjen e Ulajt për Dukagjinin.
Të mërkurën, dy gazetaret e mediumit lajmi.net, Lindita Berisha dhe Fjolla Hyseni, janë sulmuar fizikisht.
Raportohet se derisa po kryenin një reportazh për autolarjet në rrugën “C” në Prishtinë, ato u konfrontuan me një grua dhe një burrë, të cilët i sulmuan fizikisht.
Gazetaret, bashkë me kameramanin e tyre, ishin në pritje të një taksi, kur çifti i dyshuar iu afrua dhe filluan sulmin pa asnjë paralajmërim.
Gruaja dhe burri i saj përdorën dhunë fizike dhe kërcënuan që t’i marrin celularët e gazetarëve për t’i zhdukur provat e sulmit.
Edhe pasi gazetarët thirrën policinë për ndihmë, çifti i dyshuar vazhdoi kërcënimet dhe ndaloi gazetarët duke ua bllokuar rrugën.
Situata e rëndë u dokumentua nga kamera e kameramanit të lajmi.net.
Pas rastit, gazetarët u drejtuan drejt autoriteteve për të dhënë deklarata, ndërsa gazetarja Lindita Berisha, shtatzënë, u detyrua të kërkonte ndihmë mjekësore për shqetësimet e mundshme në lidhje me fëmijën.
Pas publikimit të pamjeve shqetësuese, që tregojnë sulmin fizik ndaj gazetareve, Asociacioni i Gazetarëve të Kosovës ka reaguar duke shprehur shqetësimin e thellë për këtë akt të papranueshëm.
“Sulmi fizik ndaj gazetarëve Hyseni dhe Berisha është një shkelje e rëndë e lirive të medias dhe një kërcënim serioz për sigurinë e gazetarëve në Kosovë”, thuhej nga ana e tyre.
Asociacioni i Gazetarëve të Kosovës kërkoi që Policia dhe Prokuroria të ndërmarrin të gjitha veprimet e nevojshme në mënyrë urgjente, për të adresuar sulmin që ka ndodhur.
