Sulmohet polici që intervenoi në një rast të dhunës në familje në Podujevë, goditet me shkop druri

Nuk janë të rralla rastet kur zyrtarët policorë ballafaqohen me kërcënime serioze nga qytetarë në qytete të ndryshme të Kosovës. Shpeshherë kërcënimet verbale eskalojnë edhe në sulme fizike ndaj tyre, duke ua vështirësuar punën e madje duke ua kërcënuar edhe jetën, raporton Gazeta Sinjali.

Kështu ka ndodhur edhe të hënën në fshatin Gërdoc në Podujevë, ku Policia po intervenonte në një rast të dhunës në familje.

Siç mëson Sinjali, njëri nga zyrtarët policorë është sulmuar fizikisht nga i dyshuari, i cili e ka goditur me shkop druri, duke i shkaktuar lëndime trupore.

Përballë kësaj situate, njësia policore e ka arrestuar të dyshuarin dhe i njëjti është shoqëruar në stacion policor.

Ndaj tij, Prokurori i Shtetit ka urdhëruar inicimin e hetimit në drejtim të veprës penale “Sulm ndaj personit zyrtar”.