Mërgimtarja nga Zvicra, Verona Gjinaj, garon në Kampionatin Botëror të Taiboksit në Mynih

Verona Gjinaj ka arritur sukses të madh në karrierën e saj të re në taiboks.

Me arritjet e saj të jashtëzakonshme, ajo u bë dy herë kampione e taiboksit në Zvicër. Tani e pret sfida e radhës: Kampionati Botëror ISKA në Mynih. Verona në këtë garë përfaqëson Shkollën e Arteve Merciale “Bajrami” në Lucern.

Kampionati Botëror ISKA është një ngjarje shumë e respektuar në taiboks. Aty do të takohen sportistë më të mirë nga e gjithë bota. Më këtë rast, Verona do të ketë shansin të konkurrojë me taiboksierë të talentuar ndërkombëtarisht dhe të demonstrojë aftësitë e saj.

Kampionia më e re e Zvicrës në këtë sport, Verona Gjinaj, tashmë është vendosur në Mynih të Gjermanisë. Ajo atje nuk është për shëtitje, por për të ndjekur ëndrrën e saj. “Përgatitjet kanë filluar që disa kohë më parë. Jam e gatshme për të fituar të gjitha ndeshjet. E di që nuk do të jetë e lehtë, por unë kam ardhur në Mynih për të fituar”, thotë për albinfo.ch, 19-vjeçarja me prejardhje nga komuna e Gjakovës.

Bashkë me Veronën në Mynih, përveç familjes së saj, është edhe ish-kampioni i botës në boks, tashmë trajneri i Veronës, Tefik Bajrami.

Në një postim në Facebook, trajneri Tefik Bajrami, i cili udhëheq edhe Shkollën e Arteve Merciale “Bajrami” në Lucern,  shkruan:

“Zonjusha e hekurt, Verona Gjinaj, do të marrë pjesë në Kampionatin Botëror të Taiboksit në Mynih nga data 18 deri më 22 tetor. Ne jemi përgatitur dhe të gatshëm për këto duele. Përgatitjet tona kanë qenë intensive dhe më shumë seriozitet për këtë kampionat. Verona është përgatitur shumë për këtë event dhe është e gatshme të demonstrojë aftësitë e saj në nivelin më të lartë. Ne kemi besim se ajo do të mbajë lart flamurin e ekipit dhe do të na bëjë krenarë”, ka thënë trajneri Bajrami, përcjell albinfo.ch.

Deri më tani, Verona ka arritur nëntë fitore në dhjetë meçe. “Në moshën 15-vjeçare u bëra kampionia më e re zvicerane dhe tre vjet më vonë fitova sërish kampionatin zviceran”, thotë ajo.

Verona në Mynih do të garojë në peshën 60 kilogramë, por sa fitore i duhen deri në finale, këtë ende nuk e di. “Do të doja të fitoja titullin. Do të ishte dhurata më e mirë për punën dhe mbështetjen e trajnerit tim dhe prindërve të mi. Jam e sigurt që do të luftoj me gjithë forcën time që ata t’i bëj të lumtur ”, nënvizon Verona Gjinaj