Ky është i dyshuari për përleshjen e mbrëmshme në Prishtinë, gjuajti disa herë me armë zjarri
Të dielën në orët e mbrëmjes janë dëgjuar të shtëna me armë zjarri në rrugën “Bajram Bahtiri” në Prishtinë, gjatë një përleshjeje mes dy personave. Njëri prej tyre mbeti i lënduar, por jo nga arma e zjarrit, teksa tjetri është shpallur në kërkim nga Policia. Gazeta Sinjali ka raportuar mbrëmë për këtë rast, ndërkohë që tashmë është zbuluar se kush është personi i dyshuar.
Burimet brenda Prokurorisë kanë bërë me dije se personi që po qëndron në arrati, pasi dyshohet për këtë rast është Qëndrim Marevci, i cili përveç që dyshohet se ka sulmuar fizikisht viktimën, edhe ka shkaktuar rrezik me përdorimin e armës.
Sinjali mëson i dyshuari është larguar menjëherë nga vendi i ngjarjes dhe akoma Policia nuk ka arritur të lokalizojë vendndodhjen e tij.
Pas raportimit të rastit, në vendin e ngjarjes janë sekuestruar katër gëzhoja, ndërkohë që Policia ka kryer edhe bastisje në shtëpinë e të dyshuarit.
Në anën tjetër, viktima është dërguar në QKUK, ku po merr trajtim mjekësor, si pasojë e plagëve që ka pësuar në këmbe.
Kjo është konfirmuar të dielën edhe nga shefi i Urgjencës në QKUK, Avdyl Pacolli, i cili tha për Sinjalin se viktima ka pësuar lëndim të zogut të këmbës ndërsa gjendja shëndetësore e tij është stabile
“Pacienti është trajtuar nga ekipi në lëvizje e cila e ka marrë thirrjen dhe ka shkuar në vendin e ngjarjes. Është thirrë për plagosje por nuk ka pas plagosje por ka pas lakim të nyjës së zogut të këmbës dhe është trajtuar në këmbën e majtë. Atij i është dhënë terapi për dhimbje dhe është transferu në qendren emergjente në SHSKUK”, tha Pacolli.
Edhe nga Policia kanë bërë me dije se tashmë kanë nisur hetimet për këtë rast në drejtim të veprës penale “Shkaktim i rrezikut të përgjithshëm”.
“Ka ndodhur një konflikt/ rrahje në mes të dy personave meshkuj kosovarë, ku gjatë konfliktit dyshohet se ka pasur edhe të shtëna me armë. Në vendin e ngjarjes janë gjetur katër gëzhoja. Viktima i cili ka pësuar lëndime trupore ka pranuar tretmanmjekësor, kurse i dyshuari në kërkim policor.Rasti në procedurë hetimore.”
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
