Po kërkonte lëmoshë, 29-vjeçari në Ferizaj kapet me heroinë – dërgohet në mbajtje

Varësia nga droga në Kosovë sa vjen e shtohet dhe kjo dëshmohet çdo ditë me kapjen dhe arrestimin e dhjetëra personave konsumues të substancave narkotike.

Kjo dukuri siç duket nuk po i mban imun as personat që dalin për të kërkuar lëmoshë nëpër rrugët e vendit, raporton Gazeta Sinjali.

Një rast i tillë është zbuluar të shtunën në mbrëmje, në rrugën e Reçakut në Ferizaj, ku Policia ka ndaluar një 29-vjeçar, nën dyshimin se i njëjti po kërkonte lëmoshë.

Burimet nga Prokuroria kanë bërë me dije se i riu është shoqëruar në stacion, ku pas kontrollit policor, i është gjetur një sasi e substancës narkotike, të dyshuar heroinë.

Droga, që dyshohet se e kishte për përdorim është sekuestruar nga Polica, teksa i dyshuari është intervistuar edhe për këtë veprën penale.

Për shkak të posedimit të heroinës, Prokuroi i Shtetit ka urdhëruar ndalimin e të dyshuarit për 48 orë dhe inicimin e rastit ndaj tij, për veprën “Posedim i paautorizuar i narkotikëve, substancave pikotrope ose analoge”.

Kujtojmë se në shumicën e rrugëve kryesore në qytetet e Kosovës hasen lëmoshë kërkues. Shumë prej tyre dalin me fëmijë, të cilët i keqpërdorin e shumë të tjerë dyshohet se shfrytëzohen nga grupe të caktuara.