Funksiononin si grup kriminal për shitjen e kokainës, arrestohen vëllezërit shqiptarë

Dy vëllezër dhe një tjetër bashkëpunëtor janë arrestuar si pjesë e një grupi kriminal që merreshin me shitjen e kokainës në Divajkë të Shqipërisë.

Siç raportohet, janë sekuestruar dhjetëra doza kokainë, 3 armë gjahu, 1 armë sportive, 1 armë e ftohtë, municion luftarak, 2 peshore elektronike dhe shuma parash në euro dhe lekë të përfituara nga shitja e dozave.

“Finalizohet operacioni policor i koduar “Zona”, si rezultat i një hetimi gjashtëmujor, për goditjen e një grupi kriminal të implikuar në shitjen e dozave të Kokainës, në Divjakë. Identifikohen dhe vihen në pranga 3 shtetas, 2 vëllezër bashkorganizatorë të grupit dhe 1 pjesëtar i grupit. Shoqërohen mbi dyshime për pjesëmarrje në këtë grup, 10 shtetas të tjerë“, thuhet në njoftimin e Policisë së Shtetit.

Në kuadër të këtij operacioni:

-u arrestuan shtetasit A. P., 30 vjeç dhe M. P., 32 vjeç, vëllezër;

-u ekzekutua urdhri i Prokurorit, për ndalimin e shtetasit O. L., 31 vjeç;

-nisi procedimi në gjendje të lirë për shtetasit V. Rr dhe S. B.;

-më parë, gjatë periudhës hetimore, është vënë në pranga shtetasi E. T..