Rrëzohet një aeroplan në Kazakistan, në aeroplan ishin mbi 60 pasagjerë

Një aeroplan u rrëzua pranë qytetit Aktau në Kazakistan të mërkurën, ka thënë në një deklaratë Ministria e Emergjencave kazake, transmeton Reuters.

Sipas raporteve të para, në aeroplan ishin mbi 60 pasagjerë dhe pesë anëtarë bordi. Raportohet se ka disa të mbijetuar.

Ministria ka thënë se shërbimet e urgjencës kanë shuar zjarrin që u shkaktua nga rrëzimi i aeroplanit.

Agjencitë ruse të lajmeve kanë thënë se aeroplani i përket “Azerbaijan Airlines” dhe pritej të fluturonte nga Baku në Grozny në Çeçeni të Rusisë. Por aeroplani kërkoi ulje emergjente në aeroportin Aktau në Kazakistan, pasi u devijua për shkak të mjegullës së madhe në Grozny.